Астанада митинг өтетін алаңдарға бейнебақылау камерасы қойылды

НҰР-СҰЛТАН. ҚазАқпарат – Нұр-Сұлтан қаласында митинг өтетін қоғамдық орындарға бейнебақылау камерасы қойылды. Бұл туралы Нұр-Сұлтан қаласының цифрландыру және мемлекеттік қызмет басқармасының басшысы Ботагөз Қасабек айтты, деп хабарлайды ҚазАқпарат тілшісі.

«Өткен жылы күш құрылымдарының шұғыл тапсырысына сәйкес, қала аумағында ірі митингтер өтетін қоғамдық орындарға 500 бейнебақылау камерасы қойылды. Қала бойынша бейнебақылау камерасын орнату жұмысы одан әрі жалғасады. Қазір Алматы және Байқоңыр аудандары бойынша қай жерлерге камера орнату керектігі анықталды. Сарыарқа ауданына келсек, бүгінде техникалық тексеру жүріп жатыр. Содан соң Есіл ауданына кірісеміз», - деді Ботагөз Қасабек қалалық мәслихаттың отырысында.

Оның айтуынша, бейнебақылау камераларын орнату жұмысы аудандық әкімдіктер және полиция департаментімен кеңесіп жүргізіледі.

«Тағы бір өзгеріс - бұған дейін қала картасында қай жерде бейнебақылау камерасының орнатылғаны көрсетілетін. Ендігі уақытта бейнебақылау камерасы бар деген белгіні картада көрсетуге тыйым салынды. Бұл лаңкестікке қарсы әрекеттердің алдын алу мақсатында енгізіліп отыр», - дейді ол.

Бұған дейін басқарма басшысы елордада «Сергек» камераларының артатынын айтқан еді.

Одан бөлек, Нұр-Сұлтанда цифрландырудың жаңа бағдарламасы әзірленіп жатқаны белгілі болды.