Астанада қиын жағдайға тап болған қыздарға арналған орталық ашу керек – депутат
«Бүгінгі таңда бүкіл әлем экономикалық дағдарысты бастан кешіруде. Әрине, Нұр-Сұлтан қаласы бұдан шет қала алмайды. Халықтың әлеуметтік мәселелері қаншалықты күрделі болса, сол мәселелердің бір ұшы міндетті түрде жетім балалар мен ата-ана қамқорлығынсыз қалған балаларға келіп тиеді. Мәселен, Нұр-Сұлтан қаласы әкімдігінің жанында өмірлік қиын жағдайға тап болған балаларды қолдау орталығы бар. Өткен жылдың мәліметі бойынша, сол орталыққа 35 бала тіркелсе, биыл 3 айдың ішінде сол балалардың саны 68-ге жетіп отыр», - дейді Нұр-Сұлтан қаласы мәслихатының депутаты Ләззат Разбекова-Тілеуханова.
Оның айтуынша, өмірлік қиын жағдайға тап болған 68 баланың 60% – қыздар.
«Бұл – жүректі ауыртатын мәселе. Осыған орай білім басқармасына 12-18 жас аралығындағы қыздарға арналған арнайы орталық ашуды және осы мәселені шешуге қатысты ұсыныстар дайындауды тапсыру қажет деп санаймын», - дейді ол.
Фото: Mediaworld.kz