Астанада азық-түлік тауарларының тапшылығы жоқ - әкім орынбасары
2022 жылғы 10 қаңтар 19:25

Астанада азық-түлік тауарларының тапшылығы жоқ - әкім орынбасары

НҰР-СҰЛТАН. ҚазАқпарат - Елордада әлеуметтік маңызы бар азық-түлік өнімдерінің бағасына күн сайын мониторинг жүргізіледі. Қала әкімінің орынбасары Ерлан Бекмұрзаев Нұр-Сұлтанда азық-түлік тапшылығы жоқ екенін атап өтті, деп хабарлайды ҚазАқпарат әкімдіктің ресми сайтына сілтеме жасап.

«Қаланың сауда нысандарына мониторинг жүргіземіз. Елорда аумағында азық-түлік тауарларының тапшылығы жоқ. Қаланың периметрі бойынша 6 блокпост қойылған. Барлық блокпостар бойынша алғашқы күннен бастап азық-түлік өнімдерін кіру және жеткізу бойынша үздіксіз жұмыс жолға қойылды. Азық-түлікті жеткізуге қатысты іркілістер жоқ. Барлық сауда нысандары коменданттың бұйрығымен штаттық режимде жұмыс істейді. Рұқсат етілген уақыт таңғы сағат 8-ден 22:00-ге дейін», - деді Ерлан Бекмұрзаев.

Елорда әкімінің орынбасары барлық кәсіпкерлерді Нұр-Сұлтан қаласының коменданты әзірлеген ережелерді сақтауға, атап айтқанда, сөрелерден алкоголь өнімдерін алып тастауға, белгіленген режим мен жұмыс кестесін сақтауға шақырды.

«ӘКК әріптестерімен бірлесіп әлеуметтік маңызы бар азық-түлік тауарларының бағасына күн сайын мониторинг жүргіземіз. Бағаны көтерген жағдайда кәсіпкерлерге ең қатаң шаралар қолданылады», - деді ол.

Әкімдік өкілдері қаланың ірі сауда желілерінің филиалдарына барды. Айта кетейік, елордалық сауда сөрелерінде тауар жетіспеушілігі байқалмайды.

«Қазіргі уақытта Нұр-Сұлтан қаласында Magnum желісінің барлық филиалдары ашылған. Филиалдардың жұмыс тәртібі ТЖ режиміне сәйкес анықталған. Жағдай тұрақтанған сайын филиалдардың жұмыс уақыты артады. Филиалдарда дүрлігіп жатқан халық байқалмайды, барлық әлеуметтік маңызы бар тауар қолда бар. Тауарларды жеткізу кесте бойынша жүргізіледі, бағалар тұрақты. Біз бағаны көтермедік. Бізбен бір команда ретінде жұмыс істегеніңіз үшін серіктестерімізге рахмет. Алкоголь сатылымнан алынып тасталды және, сатылмайды», - деп хабарлады Magnum компаниясының аумақтық директоры Елена Зименко.

«Төтенше жағдай режимін енгізу дүкендердің жұмысына әсер еткен жоқ, бізде барлық тауарлар бар, тек біздің дүкенде ғана емес, бүкіл желіде де бар. Сабырлық сақтау керек. Сатып алушылардан дүрлікпей, қажеттілігіне қарай сатып алуды сұраймыз, өйткені тауар барлығына жетеді», - дейді «Анвар» гипермаркетінің директоры Наталья Крастынь.


Jańalyqtar

MURAǴAT