ФУТБОЛДАН ӘЛЕМ ЧЕМПИОНАТЫ-2022

Астанада АӨСШК саммиті өтеді

2022 жылғы 26 қыркүйек, 13:11
Астанада АӨСШК саммиті өтеді

АСТАНА. ҚазАқпарат – Биыл қазан айында өтетін Азиядағы өзара іс-қимыл және сенім шаралары жөніндегі кеңестің саммитінде осы кеңесті толыққанды халықаралық ұйымға айналдыру мәселесі қаралады. Бұл туралы АӨСШК хатшылығының атқарушы директоры Қайрат Сарыбай айтты, деп хабарлайды ҚазАқпарат тілшісі.

«12-13 қазанда Қазақстан елордасы 27 мүше елдің мемлекет және үкімет басшыларын қабылдайды. Бұл жерде олар АӨСШК-ні толыққанды халықаралық аймақтық ұйымға айналдыру қадамдарын іске қосады. Бұл тұрғыда мүше мемлекеттердің біздің жұмысымыздың өзектілігін, мақсаттарымыз бен міндеттеріміздің маңыздылығын түсінуінің арқасында мүмкін болып отыр. Осындай ортақ пайымның жүзеге асатынына өте қуаныштымыз. Әрине, трансформацияның қалай жүзеге асатыны тұрғысында түрлі көзқарас бар. Кез келген трансформация саммитте жасалатын алғашқы қадамнан басталуы керек», - деді Қ. Сарыбай елордада өтіп жатқан заңсыз көші-қонға жол бермеу тақырыбына арналған семинарда .

Оның айтуынша, АӨСШК-нің барлық 27 мүшесінің бірауыздан қолдауының арқасында континентте бейбітшілік пен қауіпсіздікті ілгерілету жөніндегі сенім шаралары каталогын айтарлықтай жаңарту мүмкін болды. Бұл өз кезегінде АӨСШК мақсаттарын орындаудың негізгі құралы болып саналады.

Бұдан бұрын хабарланғандай, биыл қыркүйек айында Президент Қасым-Жомарт Тоқаев Азиядағы өзара іс-қимыл және сенім шаралары жөніндегі кеңес хатшылығының атқарушы директоры Қайрат Сарыбайды қабылдады .

АӨСШК Хатшылығының атқарушы директоры Мемлекет басшысына алдағы саммиттің қорытынды құжаттарының жобаларын келісу үдерісі туралы баяндады. Сонымен қатар Президентке АӨСШК-ні толыққанды халықаралық ұйымға айналдыру жоспары жөнінде мәлімет берілді. Бұл маңызды міндетті жүзеге асыру – Қазақстанның стратегиялық мақсаты.


Ұқсас жаңалықтар
Серіктестер жаңалықтары

Jańalyqtar

https://www.inform.kz/kz/astanada-aosshk-sammiti-otedi_a3983245
https://www.inform.kz/kz/astanada-aosshk-sammiti-otedi_a3983245