Астанада 29 сәуір күні жалпықалалық сенбілік өтеді

АСТАНА. ҚазАқпарат - «Жасыл Астана» бір айлық экологиялық акциясы аясында 29 сәуір күні жалпықалалық сенбілік өтеді, деп хабарлайды ҚазАқпарат елорда әкімдігінің ресми сайтына сілтеме жасап.

Елордада 8 сәуірден 6 мамырға дейін «Жасыл Астана» дәстүрлі экологиялық айлығы өтеді. Оның аясында коммуналдық және жалпықалалық бірнеше сенбілік ұйымдастырылады.

Еске салсақ, 8 сәуірде еңбек ұжымдары мен қала тұрғындарының күшімен полигонға 555,58 тонна қалдық шығарылды. Жалпы ауданы 2,5 млн шаршы метрден асатын саябақтар мен скверлер қоқыстан тазартылып, ағаш отырғызылды.

Екінші коммуналдық сенбілік 22 сәуір күні өтті. Оған 3 203 адам, 222 кәсіпорын мен ұйым қатысып, 587 арнайы техника жұмылдырылды. Полигонға 246,92 тонна қалдық шығарылды.

29 сәуірдегі сенбілік кезінде ұйымдар мен кәсіпорындардың ұжымдары өз аумағында ағаш отырғызып, қоқыс жинайды, сондай-ақ су айдындарының маңын тазартады.

Ағаш отырғызу учаскелерін нақтылау үшін Астана қаласы аудандары әкімдерінің аппараттарына хабарласуға болады:
Алматы ауданы: Нұрқанат Мұрат, [phone];
Байқоңыр ауданы: Нұрбол Айтбеков, [phone];
Сарыарқа ауданы: Жансейіт Тынбаев, [phone];
Есіл ауданы: Жасұлан Қырғызбаев, [phone];
Нұра ауданы: Руслан Оралов, [phone].