Астана тұрғынының 2 көлігінде бір нөмір болған
«Бейнебақылау камералары «Тoyota RAV-4» маркалы көлікті жалған мемлекеттік тіркеу нөмір белгісін таққан автомобиль ретінде тіркеді. Патрульдік полицейлер көлік құралын Ақмешіт көшесінде тоқтатты. Жүргізуші коммуналдық автотұраққа қойылған өзінің «Toyota Camry» көлігінің нөмір белгісін шешіп алып, «Тoyota RAV-4» автомобиліне таққаны анықталды. Ол аталған көлікті АҚШ-тан сатып алғанын және заңмен белгіленген тәріппен тіркеу есебіне қойып үлгермегенін айтты», - делінген ведомство ақпаратында.
Департамент мәліметінше, жүргізушінің үстінен ҚР Әкімшілік құқық бұзушылық туралы кодексінің 590-бабы 4-бөлігімен әкімшілік іс қозғалды. Ол енді 20 айлық есептік көрсеткіш, яғни 61 260 теңге көлемінде айыппұл төлейді немесе 1 жылға көлік жүргізу құқығынан айырылады. Түпкілікті шешімді мамандандырылған ауданаралық әкімшік сот қабылдайды. Көлік коммуналдық тұраққа қойылды.