Астана мен Томск туризмді бірлесе дамытуға уағдаласты

АСТАНА. ҚазАқпарат - 8 қыркүйек күні жыл сайынғы «Томск күні» мерекесі аясында көрме өтті. Көрмені қала әкімшілігінің қолдауымен Томск қаласының туристік ақпараттық орталығы ұйымдастырды, деп хабарлайды Астана қаласы әкімдігінің ресми сайты.

Көрме аясында «Астана Конвеншн Бюро» мен Томск қаласының Туристік ақпараттық орталығы арасында ынтымақтастық туралы меморандумға қол қойылды. Мақсаты - өзара тиімді ынтымақтастықты нығайту, Томск және Астана қалаларында ішкі және сыртқы халықаралық туризмді дамытуға бағытталған.  

Ынтымақтастық аясында Томскі қаласының орталығындағы навигациялық маңдайшаларында Астана қаласы туралы ақпараттар ілінген. Сондай-ақ, халық көп жиналатын орындарда Қазақстанның астанасы туралы үлестірмелі материалдар таратылды (журнал - Астана қаласының жол көрсеткіші бойынша «Astana Official Guide», Z - карта Астана қаласының мен т. б.).