«Астана» халықаралық қаржы орталығы ресми қашан ашылады
Қазір «Астана» халықаралық қаржы орталығында ұйымдастырушылық жұмыстар жүруде.
«АХҚО халықаралық таныстырылымы келесі жылдың 5 шілдесіне жоспарланған. Бірақ 1 қаңтар күні (2018 жыл - ред.) жұмысымызды ресми бастаймыз», - деді Келімбетов «ЭКСПО-2017 мұрасы» тақырыбындағы шарада.
Оның айуынша, АХҚО бірнеше органдардан құралатын болады. Олардың арасында NASDAQ (америкалық биржа) №3 биржасы, Шанхай биржасының №4 биржасы бар.
"Менің ойымша, аталған серіктестер мен біздің платформа дамудың негізгі аспектілері болмақ. Қытаймен бірлесіп жүзеге асыратын АХҚО биржасы біздің бастамаларымыздың бір бөлігі болады. Сондай-ақ бұл биржа Еуразия экономикалық одағына да қатысты, себебі негізгі нарықтармен бірге, ЕАЭО нарығына да өз қызметімізді ұсынғымыз келеді", - деп атап өтті АХҚО басқарушысы.
Қайрат Келімбетов атап өткендей, ағылшын заңына негізделген арнайы реттеуші механизм бекітілетін болады.
«Астанада дау-дамайларды шешу жөнінде орган құрамыз. Бұл мекемелер Дубай мен Әбу-Дәбидегі органдарға ұқсас болады. Қазір инвесторлар құқығы туралы, біздің өңірде жұмыс істегісі келетін инвесторларды қорғау мәселелері жөнінде пікір алмасып жатырмыз", - деді ол.
Келімбетовтың мәлімдеуінше, түрлі дау-дамайды шешетін мұндай органдардың Астанада екі түрі құрылады.
"Алғашқысы - ағылшын заңына негізделген АХҚО соттары. Олар Лондон, Сингапур, Гонконг, Әбу-Дәби нарықтарында жұмыс істеген аса тәжірибелі маман болулары қажет. Сонымен бірге, халықаралық төрелік (арбитраждық) орталығы құрылады. Аталған барлық мекемелер 2018 жылдың 1 қаңтарында толыққанды жұмыс істей бастайды", - деп түйіндеді сөзін Қайрат Келімбетов.