Астана -Бурабай шипажайы аралығына қатынайтын электр пойызы жаңа үлгімен жабдықталған
Айта кетер жайт, бұл пойыздың артықшылығы, оқыс оқиғалар болған жағдайда апаттық-құтқару жүйесінің жолаушылар мен локомотив экипажының қауіпсіздігін қамтамасыз етуі.
Бұл заманауи электр пойызы Ресейдегі Демихов машина жасау зауытында құрастырылған. Оның ерекшелігі дизайны жаңартылған және аэродинамикалық сипаттамалары жақсартылған.
Жолаушылар пойызы 3 класқа бөлінген алты вагоннан тұрады. Ал әр класта екі вагоннан, 377 жолаушыға арналған.
Екінші, үшінші кластағы вагондардан бірінші кластағы вагонның айырмашылығы да онша көп емес. Артықшылығы, 1- ші кластағы вагондарда ішкі жарықтандыру деңгейі жоғары. Вагондардағы көз тартатын әрі төзімді материалдардан жасалған орындықтарда өзіңізді еркін сезінесіз. Сондай-ақ, мұнда қосымша жүк қоятын орын да бар.
ЭП-3Д сериясындағы электр пойызында инновациялық жабдықтар, үнемді жарықдиодты жарықтандыру жүйесі, ауаны тазарту құрылғылары қолданылады.
Сондай-ақ, электр пойызы жылжымалы есіктермен жабдықталған. Яғни, бір қолмен екі есікті бір мезгілде ашуға болады.
Жолаушыларға арналған «БАР» - орналасқан жолда жүрек жалғап алуға таптырмайтын орын.
Тағы бір тоқталып өтері, мүмкіндігі шектеулі жолаушылар үшін арнайы көтергіштер бар және кіреберіс есіктегі арнайы батырма арқылы жолсерікті шақыртуға болады. Вагондарда қауіпсіздік белдігімен жабдықталған арнайы орындар да ескерілген.
Әрбір вагонда ақпарат тақтасынан пойыз жайлы қажетті мәліметті алуға болады. Сондай-ақ, бағытты көрсететін электронды маршруттық тақталар орналасқан.
Тастан Жанатұлы