Астана әуежайына Қазақстан азаматтары мінген арнайы рейс қонды
Ұшақ бортында 16 қазақстандық болған.
Қазақстандық құтқарушылар Газиантеп қаласының орталығында іздеу жұмыстарын бастап кетті.
Бұрын хабарланғандай, Президент Қасым-Жомарт Тоқаев Үкіметке Түркия Республикасына елдің оңтүстік-шығысында болған жойқын жер сілкінісінің салдарын еңсеру үшін шұғыл көмек көрсетуді тапсырған болатын.
Түркияға 41 адамнан тұратын топ барды, республикалық жедел-құтқару жасағының құтқарушыларынан бөлек, Апаттар медицинасы орталығының қызметкерлері де бар. Оларды Газиантепте Қазақстанның Түркиядағы елшілігінің өкілдері қарсы алды. ҚР Төтенше жағдайлар министрлігінің қызметкерлері келген бойда техника мен құрал-жабдықтарды түсіріп алған.
Бұған дейін Қазақстанның Денсаулық сақтау министрлігі Түркияның зардап шеккен аймақтарына 125 дәрігерден тұратын бригада жіберуге дайын екенін мәлімдеген.
Түркиядағы жер сілкінісінен қаза тапқандар саны 3419-ға жетіп, 20538 жараланғаны хабарланды. 5775 ғимарат қирап қалды. Апат аймағына көрші облыстардан техника мен өрт сөндіру машиналары жөнелтіліп жатыр.