Астана әкімі «сақалды құрылысқа» айналған Сити палас кешенінің иесін табуға уәде берді

АСТАНА. ҚазАқпарат – Астана әкімі Жеңіс Қасымбек Байқоңыр ауданының тұрғындарымен кездесуінде «сақалды құрылысқа» айналған «Сити палас» сауда-ойын-сауық кешенінің иесін табуға уәде берді, деп хабарлайды ҚазАқпарат тілшісі.

Кездесу барысында БАҚ өкілі аталмыш нысанның талай жылдан беру қаңырап тұрғанын айта келіп, ендігі тағдыры не болатынын сұрады.

«Нысанның иесін табуға тырысамын. Олай болмаған жағдайда иесі нысанды сататындай немесе құрылысты аяқтайтындай шара қабылдаймыз», – деді Жеңіс Қасымбек.

Аталмыш кездесуде Астана әкімі қала тұрғындарына сатылып жатқан көмірдің сапасын тексеру туралы тапсырма берді.

«Шұбаркөл көмірі экспортқа жіберілмейді. Ал сіздер жағып отырған көмір сапасына келсек, тексереміз. Тұрғындар көмір сатып алып жүрген учаскені барып тексеріңіздер. Ондағы көмір талапқа сай ма, жоқ па, анықтау керек», - деді ол.