Әскери теңізшілер Каспий теңізіне жиынға шығады

НҰР-СҰЛТАН. ҚазАқпарат - Құрамында Әскери-теңіз күштерінің «Орал», «Сарыарқа», «Маңғыстау» зымыранды-артиллериялық корабльдері, «Алатау» мина-тралдық кораблі және «Жайық» гидрографиялық кемесі бар топ Каспий теңізінің Қазақстан секторындағы акваториясында жиын-жорыққа шығады.

Бұл туралы ҚазАқпарат ҚР Қорғаныс министрлігінің баспасөз қызметіне сілтеме жасап хабарлайды.

Жиын-жорық 8 қазанға дейін жалғасады. Осы уақыт ішінде әскери теңізшілер әуеде, теңізде және өзгермелі нысанаға оқ атады, корабльдердің жауынгерлік оқу-жаттығуларын өткізеді, тар су айлағында, жағалау маңында және күрделі гидрометеорологиялық жағдайда жүзу жұмыстарын пысықтайды.

Бұдан өзге, кемелер топ құрамында бірлескен маневр жасайды. Әскери теңізшілер вахтаны жүріп бара жатып ауыстыруды ұйымдастырады, дабыл құралын пайдалана отырып ақпарат беруді жүзеге асырады, сондай-ақ корабльдің өміршеңдігі үшін күрес пен апатты жағдайдағы кемені тастап шығу жөніндегі нормативтерді пысықтайды.

Осындай жиын-жорықтар кеме экипаждарының практикалық дағдыларын жетілдіруге, Әскери-теңіз күштері жүзу құрамының әскери-теңіз машық деңгейін арттыруға мүмкіндік береді.