Әскери қайраткер Ким Серікбаев өмірден өтті

АЛМАТЫ. ҚазАқпарат - Әскери қайраткер, полковник, әскери ғылым кандидаты Ким Серікбайұлы Серікбаев дүниеден өтті, деп хабарлайды ҚазАқпарат тілшісі.

Қаралы хабарды Алматы қаласындағы «ҰОС ардагерлері, тыл еңбеккерлері және соғыс балалары кеңесі» қоғамдық қоры растады.

«Иә, ол кісі бүгін коронавирус инфекциясынан қайтыс болды. Ауруханада бес күн жатты», - деп хабарлады қордағылар.

Ким Серікбайұлы 1934 жылы 14 қаңтарда Ақтөбе облысы Хромтау ауданы Көптоғай ауылында дүниеге келген. 1952-1956 жылдары қазіргі ҚазМУ-де, Уфа әскери училищесінде оқыды. 1970 жылы Мәскеудегі әскери академияны бітірген.

Ғұмырының соңғы жылдарында ардагерлер кеңесінің төрағасы қызметін атқарған.

1956-1966 жылдары Қиыр, Шығыс, Прикарпатье, Мәскеу, Орта Азия әскери округтерінде взвод, рота, батальон командирі, мотоатқыштар полкында штаб бастығы, полк командирі болып қызмет атқарған.

1970-1973 жылдары Мәскеудегі әскери академияда Кубадан, Моңғолиядан келген офицерлерге жалпы тактикадан сабақ берген.

1973-75 жылдары Алматы жоғары әскери командалық училищесінде кафедра бастығы, 1975-1988 жылдары Алматы жоғары партия мектебінде кафедра бастығы.

1988-91 жылдары Б.Момышұлы атындағы республикалық әскери мектеп-интернаттың бастығы.

1992-1993 жылдары Мемлекеттік қорғаныс комитеті төрағасының кеңесшісі.

ҚР Президенті аппараты мен Минстрлігі Кабинеті жанынан құрылған Қорғаныс бөлімінің жетекшісі.

1994-1996 жылдары Минстрлігі Кабинетіжанындағы мемлекеттік аттестация комитетінде арнаулы мәселелер жөніндегі бас сарапшы.

1996-1999 жылдары ҚР Парламентінің Мәжіліс аппаратында қорғаныс және қауіпсіздік мәселелер жөніндегі кеңесші қызметін атқарған.

Әскери қайраткер 180-ге жуық ғылыми еңбектің авторы.

3-дәрежелі «КСРО Қарулы күштерінде Отанға қызмет еткені үшін» орденімен, көптеген медальдармен марапатталған.