Асқар Мамин: Халықты жұмыспен қамту және табысын қамтамасыз ету – Үкіметтің басты басымдығы
«Халықты жұмыспен қамту және кірісін қамтамасыз ету – Үкімет жұмысының басты басымдығы. Халықты жұмыспен қамтуға жәрдемдесу мақсатында «Еңбек» бағдарламасы, Жұмыспен қамту жол картасы, «Нұрлы жер», «Нұрлы жол» және жеке бастамалар да белсенді жүзеге асырылып жатыр. Толықтай алғанда биыл жұмыспен қамту іс-шараларымен 1,2 млн адам қамтылады», - деді Премьер-Министр Үкіметтің кеңейтілген отырысында.
Үкімет басшысының атап өтуінше, 2021 жылдың 1 маусымындағы деректерге сәйкес, «Еңбек» бағдарламасы аясында 210 мың адам жұмыспен қамтылды. Оның ішінде 107 мың адам тұрақты жұмысқа орналасты. Жұмыспен қамту жол картасы аясында 41 мың адам, оның ішінде 28 мың адам тұрақты жұмысқа тұрды.
«Нұрлы жер» «Нұрлы жол» бағдарламаларын жүзеге асыру шамамен 250 мың адамға, оның ішінде 124 мың адамға тұрақты жұмыс орнын құруға мүмкіндік берді», - деді Асқар Мамин.