Арыстық 130 бала Баянауылда демалады

АРЫС. ҚазАқпарат - Бүгін ҚР Білім және ғылым министрлігінің және Павлодар әкімдігінің ұйымдастыруымен Арыс қаласындағы төтенше жағдайға байланысты арыстық 130 бала мен аймақтың 10 ұстазы Баянауыл өлкесіне аттанды, деп хабарлайды ҚазАқпарат тілшісі.

Павлодар облысы әкімдігі Шымкент қаласындағы әуежайға арнайы ұшақ жіберіп, арыстық балаларды алып кетті.

Ал, «Алматы Кітап» баспасының ұжымы ұзақ жолға шыққан барлық баланы қажетті киім-кешекпен қамтамасыз етті.

Айта кетерлігі, эвакуациялық орталықтарда жатқан балаларды жазғы демалыстарға жіберу жұмыстары жалғасатын болады.