Арыстағы тазалау жұмыстары тағы 2 айға созылуы мүмкін - министр

НҰР-СҰЛТАН. ҚазАқпарат - ҚР Қорғаныс министрі Нұрлан Ермекбаев Арыстағы оқ-дәрі қалдықтары туралы айтты, деп хабарлайды ҚазАқпарат тілшісі.

«Қазір Арыста мобильді топтар мен саперлер тобы тұрақты жұмыс істеуде. Өздері тексеру жүргізіп, қауіпті заттарды алады. Табылған қалдықтардың 90 пайызы қауіпсіз, олар - жай ғана металл сынықтары. Бірақ, кейбір заттарды кескенде немесе отқа салғанда қауіп тудыруы мүмкін. Сондықтан, бағалы металл деп құнықпай, мамандарды шақырған жөн», - деді министр Орталық коммуникациялар қызметінде өткен баспасөз мәслихатында.

Оның айтуынша, негізгі жұмыстар әскери бөлім айналасында және арсенал ішінде жүріп жатыр және тазалау жұмыстары тағы 1-2 айға созылуы мүмкін.

«Елбасы тапсырмасымен қалған оқ-дәрілер арсеналдан шығарылады және қауіпсіз қоймаларға таратылады. Немесе тиісті органдарға утилизацияға беріледі немесе қаладан 60 шақырым жерде жару жолымен жойылады», - деді Н. Ермекбаев.

Тексеру жұмыстары аяқталған соң, қанша тонна оқ-дәрінің жарылып кеткені және қанша шығын келгені анықталады.

«Оқ-дәрілердің жартысынан астамы жарылып кетті. Өрт сөндірушілер екінші және үшінші базадағы өртті сөндіру арқылы, инженерлік оқ-дәрілерді сақтап қалды (...) Арсеналда авиациялық снарядтар мен теңіз оқ-дәрілері ешқашан сақталмаған», - деп түсіндірді министр.

Еске сала кетсек, Арыс қаласындағы әскери бөлімнің қоймасында 24 маусым күні таңертең жарылыс болды. Салдарынан үш адам қаза тапты - Арыс тұрғыны мен екі әскери қызметші. 170-ке жуық адам зардап шекті. 20-ға жуық үй, 9 қора-қопсы жанып, далалы аумақта 14 ошақ тұтанды. Үй-жайлар мен ғимараттардың 80-90 пайызына әртүрлі деңгейде зақым келді. Бірқатар өңірде шұғыл желілер құрылды.

Түркістан облысына арнайы барған Қазақстан Президенті Қасым-Жомарт Тоқаев Арыстағы әскери бөлімшедегі оқ-дәрі қоймасындағы жарылыстан зардап шеккен қала тұрғындарымен кездесіп, қаланың қалпына келтірілетініне уәде берді. Сондай-ақ Елбасы Нұрсұлтан Назарбаев Арыстағы жағдайға алаңдаушылық білдірді. Тұңғыш Президенттің төрағалығымен Қауіпсіздік кеңесінің отырысы өтіп, онда Арыс қаласындағы ахуал талқыланды.

Үкімет отырысында Премьер-Министр Асқар Мамин жарылыс салдарынан көз жұмғандардың туған-туыстарына көңіл айтып, тұрғындарға барлық көмек көрсетілетінін айтты. Келтірілген залалдың көлемі бағаланып, Үкімет резервінен ақша бөлінеді.

Эвакуациялау кезінде мыңнан астам ата-ана баларынан көз жазып қалды. Сәбилердің барлығы туыс-туғандарына дін-аман тапсырылды.

Факті бойынша қылмыстық іс қозғады.