Арыстағы апат: Тәулік ішінде астаналықтардан 100-ден астам қоңырау түсті
Төтенше жағдайлар департаментінің хабарлауынша, елордадағы шұғыл желі 24 маусым күні сағат 11.00-ден бастап жұмыс істеп тұр.
«Нұр-Сұлтан қаласында тәулік бойы психологтарды тарта отырып шұғыл желі ұйымдастырылды. Төтенше жағдайлар департаменті тұрғындарды сабыр сақтап, үрейге жол бермеуге шақырады. Алаңдатқан сұрақтар бойынша шұғыл желінің 8(7172) 24-51-71, 24-52-15, 24-51-47 нөмірлеріне хабарласуға болады», - делінген департамент дерегінде.
Ресми ақпаратқа қарағанда елорда тұрғындарынан түскен қоңырулардың сипатын бірнеше сауалға бөліп топтастыруға болады. Тұрғындардың бір бөлігі төтенше жағдайдың барысы мен ауқымы қандай екенін білу үшін хабарласса, енді бірі апат аумағында қалған қарт адамдар, кәмелетке толмаған балалар, тасымалдауға келмейтін науқастар мен мүгедектердің бар-жоғын білгісі келген. Ата-анасынан ажырап қалған балаларды эвакуциялаған бекеттердің мекенжайына байланысты да ондаған сауалдар қойылып, шұғыл желі мамандары жауап берген.
Еске салсақ, Арыс қаласындағы әскери бөлімнің қоймасында кеше таңертең жарылыс болғандығы туралы хабарлаған болатынбыз. Жарылыстан екі адам мерт болды.
Түркістан облысына арнайы барған Қазақстан Президенті Қасым-Жомарт Тоқаев Арыстағы әскери бөлімшедегі оқ-дәрі қоймасындағы жарылыстан зардап шеккен қала тұрғындарымен кездесіп, қаланың қалпына келтірілетініне уәде берді.