15:31, 05 Шілде 2019 | GMT +6
Арыс апаты: Екі адам әлі жансақтау бөлімінде жатыр
НҰР-СҰЛТАН. ҚазАқпарат - ҚР Денсаулық сақтау министрі Елжан Біртанов орталық коммуникацилар қызметінде Арыс қаласындағы жарылыстан зардап шеккен науқастардың хал-жағдайы туралы айтты, деп хабарлайды ҚазАқпарат тілшісі.
Министрдің айтуынша, апат болған 24 маусымнан 5 шілдеге дейін 410 арыстық медицина қызметкерлерінің көмегіне жүгінген.
«Жалпы жиыны 410 адамға медициналық көмек көрсетілді. 82-сі стационарға жатқызылды. Оның 12-сі - бала. Қазір 63 науқас емделіп, үйлеріне шықты. 19 адам әлі жатыр. Соның ішінде 2 адамның жағдайы өте ауыр. Екеуінің де диагнозы - ауыр ми жарақаты. 7 жасар бала Нұр-Сұлтан қаласындағы №2 балалар аурханасында. Тағы бір жас жігіт Түркістандағы облыстық балалар ауруханасында жатыр», - деді Елжан Біртанов.
Айта кетсек, мұның алдында денсаулық сақтау министрі Арыста жаңа емхана мен аурухана салынатынын айтқан болатын.