Әрбір азамат елдің болашағы үшін өз жауапкершілігін сезінуге тиіс - ҚР Президенті

2022 жылғы 26 қараша, 11:19
Әрбір азамат елдің болашағы үшін өз жауапкершілігін сезінуге тиіс - ҚР Президенті

АСТАНА. ҚазАқпарат – Мемлекеттік саясатымыздың негізгі бағыты – білім беру ісінен бастап индустрияландыруға дейін қоғамның барлық саласын жаңғырту. Бұл туралы ҚР Президенті Қасым-Жомарт Тоқаев салтанатты ұлықтау рәсімінде айтты, деп хабарлайды ҚазАқпарат тілшісі.

«Енді біздің ортақ мақсатымыз – заң мен тәртіп үстемдік құратын, азаматтардың құқығына лайықты құрмет көрсетілетін Әділетті Қазақстанды құру. Қоғамды трансформациялап, Қазақстанды шынайы демократиялық институттары дамыған елге айналдыру үшін ауқымды жұмыс атқаруымыз керек. Сонда ғана ұлттың жаңа сапасын қалыптастырып, қастерлі тәуелсіздігімізді нығайтамыз. Қазір біз осы қиын-қыстау жолдың басында тұрмыз», - деді ҚР Президенті.

Мемлекет басшысы алдымызда атқаратын жұмыс көп екендігін баса айтты.

«Әрбір азамат елдің болашағы үшін өз жауапкершілігін сезінуге тиіс. Мемлекеттік саясатымыздың негізгі бағыты – білім беру ісінен бастап индустрияландыруға дейін қоғамның барлық саласын жаңғырту. Еліміздің ұзақ мерзімді экономикалық өсімінің негізін жаңа технологиялар, жоғары еңбек өнімділігі, азаматтардың шығармашылық бастамалары құрайды», - деді Қасым-Жомарт Тоқаев.


Ұқсас жаңалықтар
Серіктестер жаңалықтары

Jańalyqtar