Анкарада Түркі инвестициялық қорын құру жұмыстарының барысы пысықталды

АСТАНА. ҚазАқпарат - Анкарада Қазақстанның ұлттық экономика вице-министрі Абзал Әбдікәрімов пен Түркияның қазынашылық және қаржы министрінің орынбасары Мұрат Заманның келіссөздері өтті, деп хабарлайды ҚазАқпарат ҚР Ұлттық экономика министрлігінің Telegram каналына сілтеме жасап.

Іс-шараға ҚР Әділет вице-министрі Ақерке Ахметова да қатысты.

Кездесу барысында А.Әбдікәрімов Түркия Президенті Режеп Тайып Ердоғанның қазан айына жоспарланған Қазақстанға сапары екі елдің қарым-қатынастарын одан әрі дамытуға серпін беретінін атап өтті.

Оның айтуынша, бүгінгі таңда ҚР ҰЭМ серіктестермен бірлесіп Қордың құқықтық базасын қалыптастыру бойынша белсенді жұмыс жүргізуде.

Сонымен қатар, қазақстандық тарап құрылатын қор қаражатын басқару және келісімге өзгерістер мен толықтырулар енгізу тетігі бойынша тұжырымдамалық тәсілдерді пысықтауда.

Тараптар аталған халықаралық қаржы ұйымын құру өңірлік сауданы кеңейту және экономикалық қызметті қолдау арқылы Түркі мемлекеттері ұйымына мүше елдердің экономикалық дамуына жәрдем көрсетуге мүмкіндік беретініне сенім білдірді.

Фото: t.me/presseconomy