Америкаға қашып кеткен Қазақстанның 3 азаматы ұсталды

НҰР-СҰЛТАН. ҚазАқпарат – Америкаға бой тасалаған Қазақстанның үш азаматы ұсталып, елге жеткізілді. Бұл туралы ҚР Ішкі істер министрлігінің ресми өкілі Нұрділдә Ораз мәлім етті, деп хабарлайды ҚазАқпарат тілшісі.

«Қазақстан ІІМ Интерпол Ұлттық орталық бюросы АҚШ-тың құзіретті органдарының көмегімен Америка аумағында жасырынып жүрген үш қазақстандық анықтап, ұстады. Оларға Нұр-Сұлтан мен Алматы қалаларында ірі көлемде алаяқтық жасағандары үшін еліміздің полициясы сұранысымен халықаралық іздеу жарияланған болатын», - деді Нұрділдә Ораз Ішкі істер министрлігінде өткен баспасөз мәслихаты барысында.

Оның атап өтуінше, өтен аптада іздеуге болған адамдар Қазақстанға жеткізіліп, уақытша оқшаулағышқа қамалды.

«Айта кетерлігі, соңғы уақытта шет мемлекеттердің аумағында ұсталатындарың географиясы айтарлықтай кеңейе түсті. Мәселен, соңғы 5 жылда іздеуге адамдар ТМД елдерінде, сонымен қатар ГФР, Грузия, Түркия, АҚШ, Израиль, Араб Әмірліктері, Финляндия, Ұлыбритания, Канада, Сенегал, Испания, Таиланд, Румыния, Португалия, Болгария, Австрия, Қытай, Швеция, Македония, Польша, Дания, Грекия, Хорватия сынды елдерде анықталып, ұсталды», - деді ресми өкіл.