Алты елдің желаяқтары Қарағандыдағы күзгі жартылай марафонға қатысты

ҚАРАҒАНДЫ. ҚазАқпарат - Қарағандыда алғаш рет күзгі жартылай марафон өтті. Kúzdik Jarty Marathon жүгірісіне Қазақстан, Қырғызстан, Өзбекстан, Норвегия, Польша және Ресейден келген 2 мыңға жуық адам қатысты, деп хабарлайды ҚазАқпарат тілшісі.

Ұқсас жаңалықтар

«Нұр-Сұлтан - Түркістан» марафоны аяқталды

17 аптада - 17 марафон: Қазақстандықтар елдің әр қаласында 42 км жүгірді Түркістанда мемлекеттік қызметшілер марафонға қатысты Төлеби ауданында «Марафон-2019» жүгіру жарысы өтті

Жартылай марафон бағдарламасына үш қашықтық кірді: 21 шақырым 97,5 метр, 14 шақырым және 7 шақырым.

Шара Тәуелсіздік алаңында бастау алып, үлкен шеңберден соң қайта сол жерде мәреге жетті. Қарағанды облысы әкімінің орынбасары Абзал Нүкенов жүгірудің басталуына белгі берді. Мәреден кейін ол 7 шақырым қашықтықтағы бірінші жеңімпаз атанған ең жылдам қыздарға медальдар мен грамоталарды табыс етті.

Жартылай марафонның қатысушылары трассаны еңсергенше, көрермендер мен қонақтар спортшыларды тамашалай алды. Тәуелсіздік алаңында спорттық-концерттік шоу ұйымдастырылды.

Ерлер арасындағы басты жарыста қарағандылық Вячеслав Слабаденюк жеңімпаз атанды. Ол күзетші болып жұмыс істейді, жүгіру - оның хоббиі.

«Жұмыстан кейін кешке жүгіруге шығамын. Алдымен 14-15 шақырымнан жүгіріп жүрдім, қазір 30 шақырымды еңсеремін. Бізде жүгіру әуесқойларының компаниясы бар. Онда 23-47 жас аралығындағы алты адам жиналған», - дейді Вячеслав Слабаденюк.

Келесі жылдың мамыр айында ол Аrmanga Jol жартылай марафонына қатысуға ниетті.

Әйелдер арасында басты қашықтыққа жүгіруде бірінші болып мәреге Нұр-Сұлтаннан келген Әсел Құспанова жетті.

Барлық қатысушылар шараның жоғары деңгейде ұйымдастырылғанын атап өтті. Алдағы уақытта күзгі жартылай марафон жыл сайын өткізіледі деп жоспарлануда.