Алтай Көлгінов астаналық энергетиктердің жұмысын сынға алды
Әкім Алтай Көлгінов ТЭО-2 станциясына барып, астананы газдандыру мәселелеріне қатысты көшпелі отырыс өткізді.
Отырыста әлі жоба-сметалық құжаттамалардың дайын емес екендігі анықталды. Сараптамадан өткізілмеген. Қазіргі кезде конкурстарға қатысты сот даулары өтіп жатыр. Кейбір жобалар бойынша әлі де конкурс жарияланбаған. Осының бәрі жауапты құрылымдардың бір-бірімен келіспей жасаған әрекеттерінен туындап отыр.
Отырыста алдағы жылу маусымына көмір жеткізу, «ТЭО-1 және ТЭО-2 станцияларын кеңейту және күрделі жөндеу» жобасының аясында жасалған қондырғыларды «Астана-Энергия» АҚ теңгеріміне беру мәселелері талқыланды.
Астанадағы ТЭО станцияларын газдандыру жобасының 1-кезегі 2019-2021 жылдары іске асырылуы тиіс екендігі айтылды. Осы кезеңде қаланың 633,67 млн текше метрі газ тұтынуы жоспарланған. Бұл жоспардағы жалпы мөлшердің 96%-ын (658,15 млн текше метр) қамтиды.
Әкім қазандық агрегаттарына NID технологияларын енгізу жұмыстарын бақылауды тапсырды. Бұл технологиялар қоршаған ортаға шығарылатын зиянды заттар мөлшерін қысқартуы тиіс.
«ТЭО-1 мен ТЭО-2 - астанаға өмір беріп тұрған стратегиялық нысандар. «Астана-Энергия» АҚ басшылығы келісім жасалмаған мәселелерді шұғыл реттеуі тиіс. Біз жылу электр станцияларын газ қабылдауға дайындауға тиіспіз. Әр бөлімше апта сайын атқарылған жұмыстың есебін беретін болсын», - деді әкім.