Алтай Көлгінов әкім болып тұрғанда елордада қандай жұмыстар атқарылды

2022 жылғы 8 желтоқсан, 21:25
Алтай Көлгінов әкім болып тұрғанда елордада қандай жұмыстар атқарылды

АСТАНА. ҚазАқпарат – Бүгін Астана әкімі лауазымынан босатылған Алтай Көлгінов елода тұрғындарына үндеу жариялады, деп хабарлайды ҚазАқпарат.

«Құрметті елорда тұрғындары!

Сіздермен бірге астанамыздың игілігі үшін қызмет ету мен үшін үлкен мәртебе әрі жауапкершілік болды. Үш жарым жыл бойы өздеріңізбен бірге қаламызды дамытып, түйткілді мәселелерді шешуге, сондай-ақ елорданы одан әрі көркейтуге және өмір сүруге қолайлы ету жолында жұмыс істедік.

Астана әкімі қызметіне кіріскен сәттен бастап күн сайын қала тұрғындарымен кездесіп жүрдім. Сол кездегі басты мәселелердің бірі үлескерлердің мәселелерін шешу болатын. Ұзақ уақытқа созылған әрбір құрылыстың артында пәтерін жылдар бойы асыға күткен мыңдаған адамның тағдыры тұрғанын білесіздер. Осы уақыт ішінде мәселесі қордаланған 16 мыңға жуық үлескер отбасының санын 2 мыңға дейін азайттық», - деп жазды Алтай Көлгінов.

Одан бөлек экс-әкім тағы бір маңызды бағыт – шет аймақтарымызды дамыту жұмыстары туралы айтты.

«Елорданың әрбір төртінші тұрғыны қала шетіндегі елді мекендерде тұрады. Мемлекет басшысының тапсырмасымен оларды дамытудың жеке жоспары қабылданды. Шеткері елді мекендерді дамыту бойынша осы уақыт ішінде қыруар жұмыс атқарылды. 700 шақырымға жуық газ құбыры, 42 шақырым су құбыры тартылып, 17 шақырым жаңбыр суына арналған желі, 11 шақырым кәріз желісі және т.б. салынды. Сондай-ақ елді мекендерде 250 көше, 300 аула және қоғамдық орындар жасалды», - деді Алтай Көлгінов.

Сондай-ақ, бұрынғы қала басшысы инфрақұрылымдық (газбен жұмыс істейтін жылу стансалары, жаңа ауыз су стансасы, нөсерлі кәріз желілері және т.б.), әлеуметтік нысандардың да құрылыс көлемі айтарлықтай көбейгенін атап өтті.

«Осы уақыт ішінде 93 мың оқушыға арналған 45 мектеп салынды. Оның 36-сы жұмыс істеп тұр, тағы 9-ы биылғы оқу жылында пайдалануға беріледі. Мемлекет басшысының тапсырмасымен «Жайлы мектеп» ұлттық жобасы аясында 100 мың оқушыға 25 ірі мектепті жобалау басталды. 20 мыңнан астам әлеуметтік пәтерді қамтитын тұрғын үйлер салынды.

Одан әрі жүйелілік үшін қаланың Бас жоспарына өзгерістер енгізіліп, полицентристік аясында 420-дан астам учаске бекітілді. Олар: мектептер құрылысына – 158 учаске, балабақшалар – 185, емханалар, перзентханалар, оңалту орталықтары – тағы 78 учаске.

«Астана – жайлы қала» бас жоспары аясында елорданы түрлендіру жолында ауқымды жұмыстар жүргізілді. Атап айтар болсам, 900-ден астам аула мен қоғамдық орындарды жақсарттық. Ол жерлерде тұрғындар мен қала қонақтары бос уақытын жайлы әрі денсаулығына пайдалы етіп өткізе алады. Кіші Талдыкөлде экопарк салынады. Оның жобалық-сметалық құжаттары дайын, қаржы да бөлінді», - деді ол.

Одан бөлек, бұрынғы қала басшысы «Ұлы даланың» бойынан жаңа көпір ашылғанын, Тәуелсіздіктің бойынан тағы бір көпір салынып жатқанын, 400 көше жөнделгенін еске салды.

«Сонымен бірге, қаланың үнемі дамып отыратын тірі организм екенін ескерсек, жылумен, сумен, электрмен жабдықтау және т.б. инфрақұрылымдық нысандарды кеңейту және жаңадан салу қаланың тыныс-тіршілігін қамтамасыз етуде әрқашан маңызды рөл атқарады. Астана тұрғындарының саны жыл сайын артып келеді, бұл қала басшылығының алдына жаңа талаптар мен жаңа міндеттер қойып отыр.

Елордамыздың дамуы Мемлекет басшысының әрдайым ерекше бақылауында. Астана тұрғындарының саны жыл сайын артып келеді. Бұл қала басшылығының алдына жаңа міндеттер мен талаптар қойып отыр. Шаһарымыздың әрбір тұрғыны қаланың дамуына өз үлесін қосып келеді. Бірлескен жемісті жұмыс үшін баршаңызға және әріптестерге алғыс айтамын. Жаңа әкімнің жұмысына табыс тілеймін!» деп түйді сөзін Алтай Көлгінов.


Фото: facebook.com/altay.kulginov.3

Ұқсас жаңалықтар
Теги:
Серіктестер жаңалықтары

Jańalyqtar