Алматының екі мектебінде санитарлық нормалар сақталмаған
Қалалық білім беру басқармасы мен санитарлық-эпидемиологиялық бақылау департаменті өкілдерінен құралған жұмыс тобы соңғы аптада 15 білім беру ұйымында санитариялық талаптардың сақталуын тексеріп шықты.
Алматы қалалық санитарлық-эпидемиологиялық бақылау департаментінің мәліметінше, тексеру нәтижесінде заң бұзушылықтар екі мектептен анықталды.
Бір білім беру мекемесінде дәліздер мен баспалдақ алаңдарында әлеуметтік қашықтық белгілері болмаған және оқу сабақтарын жүргізу режимі сақталмады (сабақ және үзіліс уақыты екі сынып үшін бірдей болды). Тағы бір білім беру ұйымында кварцтау ережесі сақталмаған.
Мониторинг тобының өкілдері барлық мектеп әкімшілігімен санитариялық-ағарту жұмыстарын жүргізді.
Сондай-ақ, осы күндері мектептерге жоспардан тыс тексерулер де жүргізілді. Нәтижесінде қызметкерлер мен оқушылардың маска режимі мен әлеуметтік арақашықтықтың сақтамағандығы, сондай-ақ сынып бөлмелерінде желдету режимі сақталмауы және тағы басқа да бұзушылықтар анықталды.
Жоспардан тыс тексеру барысында анықталған бұзушылық фактілері бойынша 379 210 теңге мөлшерінде 2 айыппұл салынды, бұзушылықтарды жою туралы ұйғарым берілді.