Алматылықтарға МӘМС аясында 78 млрд теңгеге медициналық көмек көрсетілді
Спикердің айтуынша, қаңтар-шілде аралығында төленген 40,6 млрд теңге стационарлық деңгейдегі медициналық көмекке, тағы 3,2 млрд теңге күндізгі стационар қызметіне жұмсалған.
«7 айдың нәтижесіне қарап халыққа көрсетіліп жатқан медициналық көмек көлемінің едәуір артқанын байқауға болады. Мәселен, бұған дейін көпшіліктің қалтасы көтере бермейтін қымбат анализдер, диагностика мен операция түрлері қазір медициналық сақтандыру есебінен көрсетіліп жатыр», – деді Тілеухан Әбілдаев.
Төленген қаржының 15,9 млрд теңгесі консультативтік-диагностикалық қызметтерге тиесілі. Консультативтік-диагностикалық қызметтер ішінде әсіресе, КТ мен МРТ-ға деген сұраныс жоғары.
Сондай-ақ, 7 айда Алматыда 996,8 млн теңгеге 62 мыңнан астам компьютерлік томография, 744,2 млн теңгеге 50 мыңнан астам магниттік-резонанстық томография жасалған. Қала бойынша онкологиялық ісікті анықтау мақсатында жасалатын 2793 ПЭТ-диагностика қызметі көрсетілген. Оған 750,1 млн теңге төленді.
«Соңғы жылдары экстракорпоральды ұрықтандыру қызметінің де жұртшылық үшін маңызы жоғары болып отыр. Қымбат қызмет түріне жататын ЭКО процедурасы 2020 жылдан бастап МӘМС пакетіне еніп, қарапайым жұртшылық үшін қолжетімді бола бастады. 2022 жылы ЭКО бағдарламаларына 3,2 млрд теңгеден астам қаржы қарастырылған. Бұған барлығы 3152 ЭКО жасалуы тиіс. Өткен 7 айда Алматыда 1639 ЭКО жасалып, оған 1,7 млрд теңге төленді. Биыл Алматы қаласы бойынша аталған бағдарламаға 8 клиника қатысып жатыр», - деді филиал басшысы.
Айтуынша, қазіргі таңда сақтандырылған азаматтар бағасы қымбат қызмет түрлерін көп пайдалануда. Соның бірі – медициналық реабилитация. 2022 жылы көрсетілген реабилитация қызметіне 4,7 млрд жұмсалды. Салыстырмалы түрде 2019 жылы оңалту қызметіне бар-жоғы 0,6 млрд теңге жұмсалған, ал 2022 жылы оған 7,5 млрд теңге қарастырылып отыр.
«Оған қоса, 2020 жылдан бастап халықтың жекелеген санаттары үшін жоспарлы стоматологиялық көмек те қолжетімді бола бастады. Мысалы, 7 айда МӘМС шеңберінде 717 мыңнан астам стоматологиялық қызмет көрсетілген, оған 1,8 млрд теңге төленді. Қазіргі таңда Алматыда МӘМС шеңберіндегі стоматологиялық көмекті 46 клиника көрсетеді», - деді Тілеухан Әбілдаев.
Еске салсақ, міндетті әлеуметтік медициналық сақтандыру арқылы жүкті әйелдер мен 18 жасқа дейінгі балаларға стоматологиялық көмек тегін көрсетіледі. Ал шұғыл стоматологиялық көмек - кепілдендірілген тегін медициналық көмек пакеті шеңберінде халықтың әлеуметтік жағынан аз қорғалған санаттарына ғана көрсетіледі.