+7 (701) 759 90 19
USD 431.07 EUR 485.51
RUB 5.69 CNY 67.47
Jańalyqtar

Алматылықтар ревматологтардың тегін кеңесін алды

2015 жылғы 27 қараша 16:49
Бөлісіңіз:

АЛМАТЫ. ҚазАқпарат - Алматыда ҚР Тұңғыш Президенті күніне орай қалалық Ревматологиялық Орталықта ашық есік күндері өтті. Бүгін таңғы 9-дан түскі 13:00-ге дейін қала тұрғындары орталық мамандарының кеңесін алып, тегін тексеруден өтті.

Келушілер әрқилы анализ түрлерін, иммунологиялық тест тапсырды. Оларға ЭКГ, остеоденстометрия сияқты диагностикалық қызмет тегін ұсынылды.

Орталық директорының емдеу ісі бойынша орынбасары Гүлнар Есіркепованың айтуынша, мұндай шаралар орталықта қалалық Денсаулық сақтау басқармасының бастамасымен жиі өткізіліп тұрады.

«Таңғы 9-дан түскі 13:00-ге дейін науқастарды тегін қабылдап жатырмыз. Адамдарды қарауға стационар және кеңестік бөлімдердің дәрігерлері, С.Асфендиаров атындағы ҚазҰМУ кафедрасының доценттері мен ассистенттері тартылды», - деді Гүлнар Есіркепова.
Аталған орталық ауқымды ашық есік күндерін биыл жазда да өткізген болатын. Сол кезде де 127 адам тексеруден өткен. Олардың 89-ы, яғни 74 пайызы алғаш қаралғандар екен.

Маманның айтуынша, қазір ревматологиялық аурулардың 150 түрі бар. «Жастар да, орта жастағылар да жиі ауырады. Бұл - өмір сапасын төмендететін, мүгедектікке әкелетін аурулардың бірі. Тірек-қимыл аппаратының зақымдануынан осындай жағдайға жетеді. Ашық есік күндерін өткізу себебі де сол. Адам уақтылы келіп, ертерек тіркеліп емделсе, науқастың өмір сапасы жақсарады. Стационарлық көмек көрсетеміз, консультациялық кеңес беріп, бақылаймыз. Арық қарай бақылауды іске асырамыз. Бұл - біздің міндетіміз», - деді ол.

Дәрігер ревматологиялық аурулардың санының артуын заманауи өмір салтымен байланыстырады.
«Ең алдымен диагностика шаралары жақсарды. Халықтың өзіне деген көзқарасы да өзгерген. Ақпарат көп. Олар бірден өзінен симптом байқаса келіп өздері қаралып жатады. Заман ағымына байланысты стресс көп, өмір ағыны тез. Соған байланысты аутоимундық аурулар көбейіп кетті. Қазір адам өмірінде гиподинамиялық режим басым. Бұл өзі тұқым қуалайтын бейімділік болатын ауру. Ата-анасында бар болса, баласынан көрініс беруі мүмкін. Ревматологиялық ауруды анықтау оңай емес. Ол әртүрлі бетпердемен өтеді. Буындық синдроммен 90 пайызы басталса, қалғаны басқа қырынан көрініс беруі мүмкін. Сондықтан, бұл жерде дәрігердің біліктілігі аса зор рөл ойнайды», - деді Гүлнар Серікәлиқызы.

Біздің каналымызға жазылыңыз:

Бөлісіңіз:

Автор:

Гүлмира Ғосманәли

Сондай-ақ... оқыңыз
Пікір қалдыру
+7
Жіберу
ONLAIN QYZMETKERLER

MURAǴAT