Алматылық бойжеткеннің асқазанынан 1 келі шаш шықты

None
None
АЛМАТЫ. ҚазАқпарат – №4 қалалық аурухана дәрігерлері алматылық бойжеткеннің ішінен 1 келі шаш алып шықты, деп хабарлайды ҚазАқпарат тілшісі.

17 жастағы бойжеткен асқазанының эпигастрий аймағы ауырып түскен. Оған фиброгастродуоденоскопия (ФГДС), компьютерлік томография жасалған. Нәтижесінде оның асқазанында шаштың жұмарланған түйнегі (трихобезоар) бар екені анықталды.

Безоар көбінесе күйсейтін жануарларда жиі кездеседі. Адамдар арасында ондай жағдай өте сирек болады.

Пациент асқазанында шаш барынан бейхабар болған.



«Бүгін жоспарлы ота жасалды. Лапаротомия, гастротомия, отасы кезінде асқазан пішінін қайталап тұрған трихобезоар анықталды. Бұл түйнек асқазанның 70 пайыз ауданын алып тұрған. Бойжеткеннің өзі шаш жегенін мойындамай тұр. Алайда бұл бірнеше жылдар бойы қалыптасқан түйнек. Оның салмағы 1 келіге жетіп қалған соң асқазанның пішіні созылған», - деді аурухана хирургы Абылай Баймаханов.


Тәжірибеде трихобезоар өте сирек кездеседі. Одан келетін қауіп жоғары.

Конкремент асқазан-ішек жолымен қозғалу кезінде асқазанның бітелуіне немесе асқазанның тесілуіне алып келуі мүмкін болды. Дәрігерлердің айтуынша, бұл жағдайда науқас медициналық көмекке уақытында жүгінген.

«Тырнақ тістеу немесе шаш шайнап жұту – бұл психологиялық әдет. Балалардың әдеттеріне ерте жастан назар аудару керек. Сондай - ақ, шаш ағзаға тамақпен бірге кетіп, жылдар бойы массаға жиналуы мүмкін», - деп толықтырды хирург-дәрігер, ассистент Дәурен Жуматаев.

Көбінесе бұл дерт 30 жасқа дейінгі қыз балаларда кездеседі.

Аурудың басталуы әдетте симптомсыз болады. Безоар өсіп келе жатқанда, іш ауырып, ауырлық сезімі пайда болады, жүрек айну, құсу, тәбеттің төмендеуі, темір тапшылығының анемиясы дамиды. Безоардың асқынуы - эрозия және қан кететін асқазан жаралары, перитониттің дамуы, аш ішектің обтурациясы болып табылады.


Соңғы жаңалықтар