Алматыдағы атыста қаза тапқан полицейлердің артында 5 және 2 баласы қалды
2021 жылғы 21 қыркүйек 12:36

Алматыдағы атыста қаза тапқан полицейлердің артында 5 және 2 баласы қалды

АЛМАТЫ. ҚазАқпарат - Алатау ауданының Ақбұлақ ықшам ауданында болған атыста қаза тапқан учаскелік инспекторлар туралы толығырақ мәліметтер белгілі болды, деп хабарлайды ҚазАқпарат тілшісі.

Алматы қалалық Полиция департаментінің бастығы Қанат Таймерденов баспасөз брифингінде атыс кезінде қаза тапқан учаскелік инспекторлар туралы айтты.

«Алатау аудандық ПБ ЖПҚБ учаскелік инспекторы, полиция майоры Дархан Дауылбайұлы Сүлеев 1982 жылы туған. Біздің департаментте 2003 жылдан бері қызмет етті. Жақында ғана Академияны бітіріп келген. Оның артында бес баласы қалды.
Ал Алатау аудандық ПБ ЖПҚБ учаскелік инспекторы, полиция капитаны Байғазиев Нұрбол Назарбайұлы 1988 жылы туған. Ол бізде 2014 жылдан бастап қызмет етті. Оның артында екі баласы қалды. Қаза тапқан екі қызметкеріміз де қызмет бабымен бірнеше рет марапатталған. Өз қызметтерінде ешқандай тәртіп бұзушылық жасамаған»,- деді брифинг барысында Қанат Таймерденов.
Айта кетейік, осыған дейін Алматыда атыс болып, 5 адамның қаза тапқанын хабарлаған болатынбыз.


Ұқсас жаңалықтар
Заңгер Бұрхан Жансейітов уақытша ұстау изоляторына қамалды
2022 жылғы 10 тамыз 11:44

Заңгер Бұрхан Жансейітов уақытша ұстау изоляторына қамалды

АЛМАТЫ. ҚазАқпарат – Алматының тергеу соты заңгер Бұрхан Жансейітовке қатысты бұлтартпау шарасын үйқамақтан уақытша ұстау изоляторына қамауға ауыстырды, деп хабарлайды ҚазАқпарат тілшісі.

«Алматы қаласының мамандандырылған ауданаралық тергеу соты 9 тамыз күні Б. Жансейітовке қатысты үйқамақ түріндегі бұлтартпау шарасын қамауға алуға өзгерту туралы шешім қабылдады. Үйқамақ түріндегі бұлтартпау шарасын 2 ай мерзімге қамауда ұстауға өзгерту санкцияланды. Қамау мерзімі ұсталған кезден бастап есептеледі. Қаулы заңды күшіне енген жоқ», - деп хабарлады қалалық соттан.

Еске салайық, 15 шілде күні Қаржы мониторингі агенттігі Алматыда заңгер Бұрхан Жансейітовтің ұсталғаны туралы хабарлаған болатын. 17 шілде күні ол үйқамаққа алынды.

Ал, республикалық адвокаттар алқасы заңгер Бұрхан Жансейітовтің адвокат емес екенін мәлімдеді.


Зиялы қауым Алматыдағы Абай ескерткішіне гүл шоқтарын қойды
2022 жылғы 10 тамыз 10:27

Зиялы қауым Алматыдағы Абай ескерткішіне гүл шоқтарын қойды

АЛМАТЫ. ҚазАқпарат – Алматы қаласында зиялы қауым өкілдері Абай ескерткішіне гүл шоқтарын қойды, деп хабарлайды ҚазАқпарат тілшісі.

Шара Абай алаңында өтті. Оған М. Әуезов атындағы Әдебиет және өнер институтының директоры Кенжехан Матыжанов, ақын-жазушылар мен қала тұрғындары қатысты.

Абай – ұлы ақын, дана ойшыл, қазақтың жаңа тарихи дәуірдегі реалистік жазба әдебиетінің атасы. Абай есімі – қазақ халқының ұлттық санасының оянуы мен рухани қайта жаңғыруының, қоғамның озық күштерінің өркениеттілікке ұмтылысы мен әлеуметтік әділдіктің символы.

Бұған дейін Жаңа Қазақстан азаматтарына арналған «Абайдың кісілік кодексі» құрастырылғаны туралы жазған болатынбыз.

Әл-Фараби атындағы ҚазҰУ жанындағы Абай ғылыми-зерттеу институтының жетекші ғылыми қызметкері, филология ғылымдарының кандидаты Ләйла Мұсалының айтуынша, «Абайдың кісілік кодексінде» - Абайдың таңдамалық даналық және қара сөздеріндегі кемел адам, толық адам қалыптасып шығу жолында халыққа айтқан өсиеттері іріктеліп алынған.

Бұл – қазіргі қоғамның әлеуметтік мінез-құлқын реттейтін заңдық күші бар құжат.

Айта кетейік, елімізде 2020 жылы Үкімет қаулысымен 10 тамыз – Абай күні деп белгіленді.

Ұлттың ұлы ойшылының ілімін зерттеушілер айтулы күн қалай тойлануы керектігі туралы ой бөлісті.



Ұлттық ұлан сарбазы дауылда әріптестерін құтқарып жүріп көз жұмды
2022 жылғы 10 тамыз 10:04

Ұлттық ұлан сарбазы дауылда әріптестерін құтқарып жүріп көз жұмды

ҚОНАЕВ. ҚазАқпарат – ҚР Ұлттық ұланы 5571 әскери бөлімінің (Алматы) мерзімдік қызмет әскери қызметшісі, қатардағы жауынгер А. Шахимов далалық жаттығу кезінде қайтыс болды, деп хабарлайды ҚазАқпарат ҚР Ұлттық ұлан «Оңтүстік» өңірлік қолбасшылығының баспасөз қызметіне сілтеме жасап.

«Жауынгерлік дайындық жоспарына сәйкес 5571 әскери бөлімінің 1 жедел мақсаттағы батальонының жеке құрамы 8-13 тамыз аралығында 5574 әскери бөлімінің оқу орталығында далалық жаттығуда болған. 9 тамызда сағат 20:55 шамасында қатты дауыл көтеріліп, жел салдарынан сарбаздар орналасқан шатыр қалашығы бүліне бастаған. Қатардағы жауынгер А.Н. Шахимов әріптестерінің қауіпсіз орынға шығуына көмектесіп жүріп өзі соңғы болып шыққан кезде, шатырдың темір жақтауы басына тиіп, жарақат алған», делінген баспасөз баянында.

Сарбазға жедел медициналық көмек көрсетіліп, санитарлық көлікпен Қонаев қаласындағы қалалық ауруханаға жеткізілген. Кейіннен қалалық аурухана дәрігерлері сарбаздың қайтыс болғанын растады.

«Қатардағы жауынгер А.Н. Шахимов өзінің жанқиярлық әрекетімен жолдастарын құтқарып, өкінішке орай өзі қатты соққыдан қайтыс болды. Ол 2003 жылы туған. Ұлттық ұлан қатарына биылғы көктемде Ақмола облысы Көкшетау қалалық Қорғаныс істері жөніндегі департаментінен шақырылған. Аталған факті туралы кезекші қызмет желісі бойынша тиісті органдарға хабарланды. Оқиғаның мән-жайы анықталып, тергеу жұмыстары жүргізіліп жатыр. Қызметтік тексеріс тағайындалды. ҚР Ұлттық ұланның Бас қолбасшылығы және «Оңтүстік» өңірлік қолбасшылығы мерзімдік қызмет әскери қызметшісі А.Н. Шахимовтың ата-анасы мен жақындарына орны толмас қайғыға ортақтасып, көңіл айтады», - делінген ресми хабарламада.



Jańalyqtar

Үрдіс

MURAǴAT