14:34, 29 Қараша 2022 | GMT +6
Алматыда жылына 200-ге жуық жер сілкінісі тіркеледі
АЛМАТЫ. ҚазАқпарат- Алматыда жылына 200-ге жуық жер сілкінісі тіркеледі. Бұл туралы өңірлік коммуникациялар қызметінің брифингінде қалалық төтенше жағдайлар департаменті басшысының міндетін атқарушы Ерлан Әлібеков мәлім етті, деп хабарлайды ҚазАқпарат тілшісі.
Спикердің сөзінше, Алматы қаласы 9-10 баллдық сейсмикалық аймақта орналасқан.
«Жыл сайын қалада 200-ге дейін әлсіз, сезілмейтін жер сілкінісі болады. Бұл ретте күші 2-ден 4 баллға дейінгі жер сілкінісі Алматы үшін фондық режим саналады. Сейсмология институтының болжам комиссиясының мәліметінше, жыл соңына дейін қалада 7 және одан да көп баллдық жер сілкінісі күтілмейді»,- деді Ерлан Әлібеков.
Айта кетейік, 28 қараша күні Алматыдан 668 шақырым қашықтықта жер сілкінген еді.
Зілзаланың ошағы Алматы қаласынан оңтүстік-батысқа қарай 243 км қашықтықта Қырғызстан аумағында орналасқан.
Энергетикалық класы – 9.9. MPV магнитудасы – 4.6. Эпицентр координаты – 41.16° с.е. 75.88° ш.б. Тереңдігі – 15 км.
Сезілгені туралы ақпарат жоқ.
Фото: assicuraci.it