11:38, 01 Сәуір 2016 | GMT +6
Алматыда жедел іздестіру барысында ұсталған ер адамнан тапанша тəркіленді
АЛМАТЫ. ҚазАқпарат - Алматыда аранайы жедел-іздестіру операциясы кезінде ұсталған ер адамнан тапанша табылды. Бұл туралы қалалық ІІД хабарлады.
"31 наурызда түскі 15:20 шамасында ұйымдасқан қылмысқа қарсы күрес басқармасының қызметкерлері 28 жастағы ер адамды ұстады. Полиция ол адамнан тапаншаны тапты. Ол ҚР ҚК 103-бабына сəйкес бұрын қылмыстық жауапкершілікке тартылған екен",- деді ІІД өкілдері.
Қазір күдікті уақытша ұстау оқшаулағышына қамалды. Аталған дерек бойынша ҚР ҚК 287-бабы бойынша тергеу амалдары басталды.
Айта кету керек, кеше əл-Фараби мен Жароков көшелерінің қиылысында жүргізілген арнайы операция барысында тəртіп сақшылары күдіктіні қолға түсірген болатын.