Алматыда жасөспірімдер футбол турнирінде төбелес шығарды

АЛМАТЫ. ҚазАқпарат – Алматыда футбол турнирі кезінде жасөспірімдер арасында төбелес шықты, деп хабарлайды ҚазАқпарат тілшісі.

Әлеуметтік желіде бір-бірімен төбелесіп жүрген жасөспірімдердің видеосы шықты. Видео астындағы жазбада жанжал Орбита шағын ауданында болғаны туралы жазылған.

Алматы қалалық полиция департаментінде аталған оқиға бойынша Бостандық аудандық полиция басқармасы тергеу жүргізіп жатқанын хабарлады.

«Оқиғаның мән-жайын білу үшін төбелеске қатысушылар полиция басқармасына жеткізілді. Олардың әрекетіне құқықтық баға берілетін болады. Сонымен қатар, істің мән-жайын анықтау үшін мектеп оқушылары арасындағы футбол турнирінің ұйымдастырушылары полицияға шақырылды»,- деп хабарлады қалалық полиция департаментінің баспасөз қызметінде.