Алматыда Жаңа жыл мерекесі қарсаңында азық-түлік бағасы тұрақты - әкімдік

АЛМАТЫ. ҚазАқпарат - Алматыда Жаңа жыл мерекесінің алдында бағалардың күрт өсуі байқалмайды, деп хабарлайды «ҚазАқпарат» ХАА қаланың ауыл шаруашылығы басқармасына сілтеме жасап.

«Меркенің алдында сұраныстың артуына байланысты бағаның да аздап құбылуы ықтимал. Жалпы алғанда, азық-түлік бағасына деген орташа көрсеткіш тұрақты. Бір аптаға жасалған мониторинг бойынша, жұмыртқаның бағасы 0,6%, сары май бағасы 0,5% ғана артқан»,-делінген ведомствоның хабарламасында.

Бұл ретте кейбір азық-түлік түрлеріне бағаның керісінше, төмендеуі байқалады. Айталық орамжапырақ бағасы 2,9%, сәбіз бен қант бағасы 1% төмендеген.

«Сондай-ақ осыған дейін жасалған азық-түлік бағасын шекті деңгейден асырмау жөніндегі келісімдерге сәйкес, жылыжай өнімдерінің құны бұрынғы деңгейде қалып отыр. Айталық, жергілікті өндірушілердің қызанақтары келісіне 500 теңгеден, қызыл бұрыш - 750, қияр 600 теңгеден саудаланып жатыр»,-деп қосты басқарма өкілдері.

Мерекелердің қарсаңында ауыл шаруашылығы басқармасының өкілдері азық-түлік дүкендері мен қаланың 17 базарымен бағаларды негізсіз өсірмеу бойынша тиісті жұмыстар жүргізуде.

Сондай-ақ демалыс күндері өтетін ауыл шаруашылығы өнімдерінің жәрмеңкесі желтоқсанның 31-не дейін созылатындығы хабарланды.

Мая Теңізбаева