Алматыда заңсыз сақталған қару-жарақтарды қабылдау басталды
2022 жылғы 17 қаңтар 13:53

Алматыда заңсыз сақталған қару-жарақтарды қабылдау басталды

АЛМАТЫ. ҚазАқпарат – Алматыда заңсыз сақталған қару-жарақтарды қабылдау шарасы басталды. Бұл туралы Алматы қалалық полиция департаменті мәлім етті, деп хабарлайды ҚазАқпарат тілшісі.

Қалалық полиция департаментінің хабарлауынша, бұл шара заңсыз қару сақтаған азаматтарға оларды жақын жердегі полиция басқармасына өз еркімен тапсыруға мүмкіндік беріледі.

Сонымен қатар, ҚР ҚПК-нің 287 бабына сәйкес - қару мен оқ-дәрілерді тапсырған адамдар қылмыстық жауапкершіліктен босатылады.

«Ұрланған қару-жарақ, оқ-дәрілер және арнайы құралдар туралы ақпарат білетін болсаңыз, «102» пультіне хабарласуыңызды сұраймыз, анонимділікке кепілдік беріледі»,- делінген хабарламада.

Заңсыз сақталған қару-жарақ пен оқ-дәрілерді өз еркімен бермеген азаматтар анықталған жағдайда қылмыстық жауапқа тартылады.

Сұрақтар бойынша мына телефондар арқылы хабарласуға болады: 8-747-333-91-60; 8-777-346-44-77


Автор:
Тілші

Jańalyqtar

MURAǴAT