Қолданушы баптаулары
Қолданушы баптаулары
+7 (701) 759 90 19 Лента
Астана: 21 °С
Алматы: 21 °С
USD 345.55 EUR 401.01
RUB 5.45 CNY 50.98
Жаңалықтар

Алматыда ұсталған үш алаяқтың әрекетінен зардап шеккендер іздестірілуде

2018 жылғы 13 қаңтар 13:10 1314
Бөлісіңіз:
Алматыда ұсталған үш алаяқтың әрекетінен зардап шеккендер іздестірілуде

АЛМАТЫ. ҚазАқпарат - Алматыда түрлі қылмыстарға қатысы бар деген күдікпен үш адам ұсталды. Бұл жайлы қала ІІД баспасөз қызметі жариялады, деп хабарлайды «ҚазАқпарат» ХАА тілшісі.

Бостандық ауданының қылмыстық полициясы Алматы тұрғындарын аталған күдіктілерді тануға шақырып жатыр.

«Аталған үш фигурант жеке әрекет еткен, олардың арасында ешқандай байланыс жоқ. Әрқайсысы өз бетімен қылмыс жасаған. Қырғызстанның Алматыдағы туыстарының үйінде тұратын 20 жастағы азаматы келгеніне екі ай болуына қарамастан, бірнеше рет алаяқтық жасап үлгерген. Тәуліктік пәтер жалдап, оны пәтер іздеп жүргендерге бірнеше айға жалға беремін деп, ақшасын алып, тайып тұрған», - дейді Бостандық аудандық ІІБ жанындағы полиция бөлімінің бастығы Тимур Өсекбаев.

Ұсталғандардың екіншісі 1983 жылы туған Алматы тұрғыны.

«Ол пәтер иелері кооперативінен келген электрикпін деп тұрғын үйлерге кірген. Электр есептеуіштері немесе автоматты сөндіргіштерін жөндедім, ауыстырдым деп алдап, үй иелерінен ақша талап еткен. Шындығында ол ештеңе істемеген және пәтер иелері кооперативінде де жұмыс істемейді. Үй иелеріне ескі есептеуіштерді жаңасына алмастырғаны туралы жалған чек көрсетіп, қолма-қол ақша төлеуін талап еткен. Сенгіш азаматтар оған ақша төлеген. Айта кетерлігі, алданғандардың көпшілігі зейнеткерлер, егде жастағы адамдар», - дейді Т. Өсекбаев.

Келесі қылмыскер де Алматы тұрғыны. 40 жастағы ер адам таныстары арқылы төмен бағамен көп мөлшерде жаңа iPhone8 алғысы келетіндерді тапқан.

«Ер адам оларға ұялы байланыс компанияларының бірінде тамыр-таныстары бар екенін айтып, смартфондарды арзан бағамен алуға болатынына сендірген. Бірақ арзан смартфонды тек көтерме сауда арқылы ғана алуға болатынын, кем дегенде 10 дана телефон сатылатынын айтады. Жәбірленушілердің бірімен «мәміле жасасып», 640 мың теңгесін алған да, ізін суытқан», дейді полиция полковнигі.

Ол осы тақылеттес қылмыстары үшін бұрын да сотталған.

«Аталған тұлғалар алдау жолымен азаматтардың сеніміне кіріп, тонап отырған. Олардың әрекеттері ҚР ҚК 190-бабымен («Алаяқтық») қаралады. Үшеуіне де қатысты сотқа дейінгі тергеп-тексеру жүріп жатыр. Күдіктілер өз айыбын мойындап отыр. Бұл тұлғалардың қылмыстық әрекеттері көп мәрте қайталанатындықтан, жәбірленуі мүмкін азаматтардың 298-52-80 және 298-52-84 телефон нөмірлеріне қоңырау шалуын сұраймыз», - дейді Т. Өсекбаев.

 

 


Басты сөздер: Алматы, Қылмыспен күрес,
Бөлісіңіз:
Онлайн қызметкерлер
Редактор
Айдар Оспаналиев
Айдар Оспаналиев
954-059
Мұрағат