Алматыда Ұлттық ұланның сарбаздары Қазақстанда алғашқылардың бірі болып дауыс берді

None
АЛМАТЫ. ҚазАқпарат - 5571 әскери бөлімінің сарбаздары ҚР Парламентінің Мәжілісі және Алматы қаласының мәслихат депутаттарын сайлауда өз таңдауын жасады, деп хабарлайды ҚазАқпарат тілшісі.

5571-әскери бөлімінде орналасқан № 107 сайлау учаскесінде сап түзеген сарбаздар дауыс беруді таңғы сағат 06:00-де бастады.

«Бүгін ерекше күн. Себебі Қазақстан Республикасының азаматы ретінде дауыс беру құқығымды пайдаланып тұрмын»,- деді қатардағы жауынгер Ричард Зайенчковский. Қатысушылардың басым бөлігі алғаш рет дауыс беріп жатыр. Солардың бірі, 6 ай бұрын әскерге шақырылған Аман Ермахан. «Мен Астана қаласынан шақырылдым. Өмірімде бірінші рет дауыс бердім. Отанымыздың болашағына бей-жай қарай алмаймын. Сондықтан өз таңдауымды жасадым», - дейді сарбаз Аман Ермахан.

Әскери бөлімде сайлау өткізуге барлық жағдай жасалған. Сайлау жәшіктері мен 7 дауыс беруге арналған кабина бар. «Біздің сайлау учаскесінде дауыс беру таңғы сағат алтыда басталды. Біздің мақсат- Қазақстанның дамауына, өркендеуіне өз үлесімізді қосу.

«Алыптың қуаты халықта, халықтың қуаты бірлікте», демекші саяси науқанға үлкен жауапкершілікпен қатысып жатырмыз. Сарбаздардың көңіл күйі өте жақсы», - дейді 5571-әскери бөлімінің командирі Бақдаулет Оралұлы.

Алматы сайлау комиссиясының мәліметінше, мегаполистегі 7 әскери бөлімде дауыс беру сағат алтыда басталды.

Бұған дейін хабарлағанымыздай, Астана уақытымен таңғы сағат 4-те Сеулде №258 және Токиода №261 сайлау учаскелері әлемде бірінші болып ашылды.

Оңтүстік Кореядағы ҚР азаматы курсант Асанов Ельнур бірінші болып дауыс берді. Кейін әлімнің тағы 9 қаласында дауыс беру басталды.

ҚР Конституциясына сәйкес, Парламент Мәжілісі аралас сайлау жүйесі бойынша Конституциялық заңда белгіленген тәртіппен сайланатын 98 депутаттан тұрады. Бірыңғай жалпыұлттық сайлау округі аумағы бойынша, яғни партиялық тізім бойынша Мәжілістің 69 депутаты, бір мандатты аумақтық сайлау округтері бойынша – 29 депутат сайланады.

19 қаңтарда Мемлекет басшысы Қасым-Жомарт Тоқаев жетінші сайланған ҚР Парламентінің Мәжілісін тарату және 19 наурыз күні Парламент Мәжілісі депутаттарының кезектен тыс сайлауын тағайындау туралы Жарлыққа қол қойған еді. Бұл күні Мәжіліспен қатар мәслихат депутаттарын да кезектен тыс сайлау ұсынылды.

Бұл күні 12 млн-ға жуық азамат таңдау жасайды. Алдын ала тұрғылықты жері бойынша 11 970 406 сайлаушы анықталды. Сайлаушылардың ең көбі – 1 177 507 сайлаушы Түркістан облысында, ал ең азы – 138 277 сайлаушы Ұлытау облысында тіркелген. 2023 жылғы 4 наурыздан бастап учаскедегі сайлаушылар тізіміндегі деректері тексеру мүмкіндігі берілді.


Соңғы жаңалықтар