12:41, 27 Қазан 2017 | GMT +6
Алматыда ТЖД қызметкері көршілерін өрттен құтқарды
АЛМАТЫ. ҚазАқпарат - Алматыда Алатау ауданындағы Атлетикалық ауылда өрт болды, деп хабарлайды ҚазАқпарат тілшісі.
Қалалық ТЖД баспасөз қызметінің өкілі Сандуғаш Баймұхамбетованың айтуынша, түнгі 1:21 шамасында Алғабас шағын ауданы, 5/4 үйдің екінші қабатындағы пәтер өртке оранған.
Өрт сөндірушілер келгенше сол үйде тұратын ТЖД қызметкері Айдос Нүсіпбаев сырттағы айғай-шуды естіп, көмекке ұмтылған.
Нүсіпбаев дереу өрт сөндірушілерді шақырып, өртенген пәтердің иесі Есбергенованы құтқарған.
Ол 4 көршісімен біріге отырып, 1-қабаттың терезесіне өрмелеп шығып әйелдің терезе арқылы түсуіне көмектескен.
ТЖД қызметкері үйде ешкім қалмағанына көз жеткізген соң өртенген подъезге кіріп тағы да 10 көршісін, оның ішінде 2 баланы қауіпсіз жерге алып шыққан.
Тілсіз жау 30 шаршы метр аумақты шарпыды.
Қызыл жалынды ауыздықтауға 29 адам мен 8 техника жұмылдырылды.