Алматыда тоғыз қабатты тұрғын үйден 65 адам эвакуацияланды

АЛМАТЫ. ҚазАқпарат – Бүгін Алматының «Ақкент» ықшам ауданында орналасқан тоғыз қабатты тұрғын үйден өрт шықты. Бұл туралы қалалық ТЖД мәлім етті, деп хабарлайды ҚазАқпарат тілшісі.

Өрт туралы хабарлама сағат 14:30-да түскен.

«Құтқарушылар жеткенде 7-қабаттағы пәтердің лоджиі – жалпы алаңы 10 шаршы метр жер өртеніп жатқаны және 8-9 қабаттарға таралу қаупі анықталды. Адамдарды эвакуациялау мен құтқару жұмыстары жүргізілді. Қабылданған шаралардың нәтижесінде 7 адам құтқарылып, 65 адам, оның ішінде баласы бар әйел эвакуацияланды. Өрт 15:02-де толығымен сөндірілді. Өрттің шығу себебі анықталып жатыр» делінеді қалалық ТЖД хабарламасында.

Алматы қалалық ТЖД өрт қауіпсіздігінің қарапайым ережелерін сақтауды, яғни электр құралдарын қосулы күйде қараусыз қалдырмау, балкондарды жанғыш материалдармен қаптамау және темекі шекпеу туралы ескертті.

Еске салайық, Алматыда жеке тұрғын үйдің ауласынан өрт шыққан болатын.

Сондай-ақ, Алматыда көпқабатты үйдің шатырындағы өртті 40 адам жабылып сөндірген еді.