Алматыда «Таңжарық оқулары» өтті
Қазақ мемлекеттік қыздар педагогикалық университетінде өткен дәстүрлі шараға «Халықаралық Таңжарық зерттеу қоғамдық қорының» төрағасы, жазушы Тұрсынәлі Рыскелдиев, филология ғылымдарының докторы, профессор, Абай атындағы ҚазҰПУ-дың «Қазақ әдебиеті» кафедрасының меңгерушісі Темірхан Тебегенов, зерттеуші, Таңжарықтанушы Тілеужан Сақаловтың жары Бөпен Жексебаева, Таңжарықтың немересі Сайра Нұржігітқызы арнайы қатысып, ізгі тілектерін білдірді.
«Таңжарық оқуларына» 4 жоғары оқу орнынан 16 студент қатысты.
Ұлт қайраткерінің тағдыр жолы мен өшпес мұрасын насихаттау мақсатында өткізілген «Таңжарық оқуларының» жеңімпазы ретінде Қазақ мемлекеттік қыздар педагогикалық университетінің 2 курс студенті Айжан Мелдебек танылды. 1-орын Абай атындағы Қазақ ұлттық педагогикалық университетінің 2-курс студенті Салтанат Анәпияеваға, 2-орын - Ақгүл Айдарбековаға, 3-орын Қамажай Еркебаеваға бұйырды. Сонымен қатар, таңжарықтанушы Тілеухан Сақалов және ақындар Ақыт Үрімжіұлы, Асылхан Мыңжасарұлы атындағы арнайы жүлделер табыс етілді. Ал, қалған студенттер сертификаттармен марапатталды.