Алматыда тағы да қосқабатты үй өртенді
Бұл туралы қалалық ТЖД баспасөз қызметінің жетекшісі Гүлшат Дәуренбекова хабарлады.
Оның айтуынша, өрт таңғы сағат 4-те тұтанған. Қызыл жалын бірінші қабаттағы пәтерден басталып, 40 шаршы метр аумақты шарпыды.
Өрт сөндірушілер тілсіз жауды жарты сағатта ауыздықтап үлгерген.
«Төтенше жағдай салдарынан 2 адам зардап шекті. Бірі - осы үйдің тұрғыны ауруханаға барудан бас тартты. Сондай-ақ, бас сүйегіне зақым келген полиция қызметкері жақын маңдағы ауруханаға жеткізілді. 50 тұрғын қауіпсіз жерге көшірілді», - деді Г.Дәуренбекова.
Қазір өрттің неден тұтанғаны анықталуда.
Естеріңізге сала кетейік, бұл бірінші тіркелген жағдай емес. Тамыз айының өзінде Алматыда каркас-қамыстан салынған 2 үйден өрт шықты.
Қазір өрт салдарынан 50-ге жуық адам баспанасынан айырылып, күркешіктерде жан бағып жүр.