Алматыда су басу қаупі бар аймақтар коммуналдық қызметтердің бақылауында
Қалалық әкімдіктің мәліметінше, коммуналдық қызметттерінің және аудандық Төтенше жағдайлар басқармаларының күштері мен құралдары қауіпті аймақтарға алдын ала жіберілді. Жауын-шашынға дейін инертті материалдар дайын болды.
Бүгін 16 тамыз күні су басып қалған 10 оқиға тіркелді, оның 5-і қалпына келтірілді. Қалған 5 мекенжайда суды сору және арықтарды тазарту жұмыстары жалғасып жатыр.
Медеу ауданына қарасты Есенберлин көшесіндегі № 221 үйдің жанында су жиналып қалды. Мұнда коммуналдық ұйымдардың қызметкерлері арық желісін тазартып жатыр.
Сонымен қатар, Ө. Жәнібеков көшесіндегі 76-үйдің ауласына да су жиналып қалған. Бұл жерде коммуналдық ұйымдардың қызметкерлері жұмыс істеуде.
Алмалы ауданының Абай даңғылы бойындағы Наурызбай батыр көшесінің қиылысында, Мұқанов көшесіндегі 172-үйдің жанында; Бруно көшесіндегі 1-үйдің жанында жиналған су сорғызылып, арық желісі тазартылып жатыр.
Розыбакиев көшесі 5 «а», Қарасай батыр көшесі 315; Брусиловский көшесі 100а-үйіндегі аулада су жиналған. Бұл жерлерге де коммуналдық ұйымдардың күштері жіберілді.
Алатау ауданында коммуналдық қызметтер «Қарасу» шағынауданындағы Аралқұм көшесіндегі 22-үйге барды.
Жетісу ауданында Райымбек даңғылындағы «Нұрым» мейрамханасының аумағында инженерлік коммуникациялар жұмыс істеп жатыр.
Су басып қалудың басты себебі – арық желісін тұрмыстық қалдық бітеп тастаған.
Еске салсақ, бұған дейін ТЖД 2021 жылғы 14 тамыздағы №28 ескертуі бойынша кей жерлерде жауын-шашынның, беткейлерде көшкіннің болуы мүмкін екенін, өзендерде су деңгейінің көтерілгенін хабарлаған болатын.