Алматыда полицейлердің көліктерін қиратқандарға қатысты тергеу аяқталды
«Алматы қаласында арнайы прокурорлар 3 адамға қатысты сотқа дейінгі тергеп-тексеруді аяқтады. Олар жаппай тәртіпсіздіктерге қатысқаны, мемлекеттік органдардың ғимараттарына шабуыл жасағаны және билік өкілдеріне күш қолданғаны үшін күдікке ілінді», - деді Елдос Қилымжанов Орталық коммуникациялар қызметінде.
Оның айтуынша, күдіктілер қаңтардың 4-інен 5-іне қараған түні Алматы қаласының орталық алаңында болып, басқа адамдармен топтаса полицияның 42 қызметтік автокөлігін қиратқан.
«Түрлі құралдармен қаруланып, құқық қорғау қызметкерлеріне қатысты зорлық-зомбылық әрекеттерін жасады. Содан кейін әкімдік ғимаратына шабуыл жасауға және өртеуге белсенді түрде қатысты. Олардың осы қылмыстарға қатыстылығы бейнекамера жазбаларымен, куәгерлердің жауаптары және сараптамалық зерттеулермен расталады. Қылмыстық іс айыптау актісімен сотқа жолданды», - деді Бас прокуратура өкілі.
Бұдан бұрын хабарланғандай, қазіргі кезде арнайы прокурорлардың іс жүргізуінде жаппай тәртіпсіздіктер бойынша 53 және терроризм актілеріне қатысты 32 қылмыстық іс бар .