Алматыда Pfizer вакцинасы қанша адамға салынды

АЛМАТЫ. ҚазАқпарат – Алматы өңірлік коммуникациялар қызметінің алаңында С.Д. Асфендияров атындағы Қазақ ұлттық медицина университетінің жұқпалы және тропикалық аурулар кафедрасының профессоры Равиля Егембердиева 12 жастан асқан балалардың ата-аналарын оларды вакцинациялауға шақырды, деп хабарлайды ҚазАқпарат тілшісі.

Алматы қалалық қоғамдық денсаулық басқармасының мәліметінше, қалада Pfizer препаратымен 2 736 адам вакциналанған: 1 644 жасөспірім, 251 жүкті әйел және 841 бала емізетін ана.

Сипкер атап өткендей, алматылықтардың осы санаттарын вакцинациялау шешімі АҚШ, Германия, Ұлыбритания, Израиль, Бельгия, Үндістан және БАӘ тәжірибесіне негізделген.
Ол Pfizer шығарған «Комирнати» вакцинасы ДДҰ мақұлдаған тізімге енгізілгенін еске салды. Сондай-ақ, осы ұйымның аралық мәліметтері бойынша 12-15 жас аралығындағы жасөспірімдердің қатысуымен клиникалық зерттеулердің үшінші кезеңі препараттың жоғары тиімділігі мен айтарлықтай жоғары қауіпсіздігін көрсетті.
Профессор «Комирнати» Pfizer вакцинасы жүкті әйелдерге де ұсынылғанын тілге тиек етті.
«Олар ковид инфекциясының ауыр жағдайы үшін қауіп тобына кіреді. Сондықтан денсаулықты және өмірге әлі келмеген нәрестені COVID-19-дан қорғаудың ең тиімді әдісі-вакцинация.Егер әйел жүктілікке дейін екпе салып үлгермеген болса, оны 16-37 апта аралығында вакциналану ұсынылады», - деді Равиля Егембердиева.
Сонымен қатар, ол ата-аналар баласының өмірі үшін жауапты екенін айтты.
«Қазіргі кезде жүкті әйелдер мен балалардың ата-аналары өздерінің және баласының өмірі үшін жауапты. Коронавирус вакцинациядан кейінгі қысқа мерзімді жанама әсерлерге қарағанда әлдеқайда қауіпті», - дейді инфекционист.
Ол COVID-19-ға қарсы вакцинаның әйелдер мен ерлердің репродуктивті денсаулығына кері әсерін нақтылайтын дәлелдердің жоқ екенін атап өтті.