Алматыда өткен аптада 27 бала ішек инфекциясын жұқтырған

АЛМАТЫ.ҚазАқпарат - Алматыда өткен аптада 27 бала ішек инфекциясын жұқтырған. Бұл туралы қалалық тұтынушылардың құқықтарын қорғау департаментінің баспасөз қызметінен мәлімдеді.

«Өткен аптада 14 жасқа дейінгі балалардың ішек ауруын жұқтырғаны туралы 27 дерек, сальмонелла дертін жұқтырғаны туралы 6 дерек тіркелді. Бұл жағдайлардың 87,5 пайызында науқастар үйде жасалып және үйде сақталған тағамдарды жеген. Сондай-ақ, ересектер арасында А гепатитін жұқтырғаны туралы 2 жағдай тіркелді», - делінген хабарламада. Баспасөз қызметінің мәлімдеуінше, өткен аптада 50 нысан тексерілген болатын. Тексеру нәтижесінде 10 нысанның санитарлық нормадан ауытқығандығы анықталды, 1007488 теңге көлемінде 74 айыппұл салынып, 8 ескерту жасалды. Тексеру нәтижесінде 4 лауазымды тұлға жұмыстан босатылды. Алатау және Бостандық аудандары бойынша санитарлық ережелерді сақтамаған 3 нысанның қызметін тоқтату туралы іс сотқа жіберілді.