Алматыда мемлекеттік кірістер департаментінің бас маманы парамен ұсталды

АЛМАТЫ. ҚазАқпарат - Алматы қаласы мемлекеттік кірістер департаментінің Түрксіб ауданы бойынша кірістер басқармасының бас маманы парамен ұсталды. Бұл туралы ҚазАқпарат Сыбайлас жемқорлыққа қарсы іс-қимыл агенттігіне сілтеме жасап хабарлайды.

Ведомствоның мәліметіне сәйкес, Алматы қаласының Түрксіб аудандық сотының үкімімен Алматы қаласы Мемлекеттік кірістер департаментінің Түрксіб ауданы бойынша кірістер басқармасының бас маманы Н.Қарабалаев пара алуда көзделген қылмысты жасағаны үшін кінәлі деп танылды. Бас маман жеке кәсіпкер (1-ші топтағы мүгедек) мен «З» қоғамының басшысынан ЖК шотынан арестты алып тастаумен арнайы салық режимін қалдырғаны үшін 260 мың теңге сомасында пара алған.

«Н.Қарабалаевқа мемлекеттік қызметте қызмет атқару құқығынан өмір бойына айыра отырып, 7,8 млн теңге көлемінде айыппұл салынды», - деді департамент.

Еске салайық, бұған дейін Қостанай облыстық сотының судьясы ірі көлемде пара алу кезінде ұсталғанын хабарлағанбыз.