Алматыда коронавирус жұқтырған 84 бала ауруханада емделіп жатыр
1 мамыр күнгі ақпарат бойынша, бір тәулікте қалада 697 адам коронавирус жұқтырған. Мұның ішінде симптомды, жеңіл және орташа деңгейдегі белгілермен - 581, симптомсыз – 116 науқас тіркелді.
« Инфекциялық стационарларда 3570 адам бар (төсек-орынның жалпы саны - 6 060), оның ішінде 84 бала емделуде», – деп нақтылады Қоғамдық денсаулық сақтау басқармасының баспасөз қызметінен.
Сондай-ақ, реанимация және қарқынды терапия бөлімінде 224 адам жатыр. Ал 35 науқас жасанды тыныс алу аппаратына қосылған. Инвазивті емес жасанды тыныс алу аппаратында 72 адам ем қабылдауды жалғастыруда.
Медициналық-санитариялық алғашқы көмек мобильді бригадаларының және Телемедицина орталығының амбулаториялық бақылауында 5388 пациент бар. Оның ішінде 4780 адамда індет белгілері болған, олар орташа ауыр жағдайда. 608 адамда коронавирус белгілері жоқ.