Алматыда көлік айнасын ұрлаған 344 адам ұсталды

АЛМАТЫ. ҚазАқпарат - Алматыда автокөлік айнасын ұрлау 2,5 есеге қысқарды. Бұл туралы  қалалық Полиция Департаменті криминалды полиция басқармасының басшысы, полиция подполковнигі Есен Ысқақов айтты, деп хабарлайды ҚазАқпарат тілшісі.

Оның айтуынша, биылғы 12 айда бөгденің мүлкін ұрлау көрсеткіші 2,9% -ға қысқарған.

«Өзгенің мүлкін ұрлағаны үшін 6 213 адам ұсталған. Ұрлықпен айналысқан 104 қылмыстық топтың әрекеті әшкереленіп, оның ішінде 24 топ тек пәтер ұрлаумен айналысса, қалған 28-і көлік ұрлығымен, 46-cы ұрлықтың басқа түрімен айналысқандығы белгілі болды», -деді полиция подполковнигі.

Жалпы алғанда, Алматыда тек автокөліктің айналарын ұрлаған 344 адам ұсталған. Сондай ұрылардың бірі, 37 жастағы ер адамды бүгін  құқық қорғау өкілдері ұстады. Оңай ақша табуға машықтанған ол «Алғабас» ықшамауданында Nissan Cefiro маркалы автокөлігінің әйнектерін ұрламақ болған.