Алматыда қатерлі ісікке шалдыққандар саны өскен

АЛМАТЫ. ҚазАқпарат - Алматыда соңғы алты жыл ішінде қатерлі ісікпен ауыратындар саны шамамен 8 мың адамға артқан, деп хабарлайды ҚазАқпарат тілшісі.

Алматы қалалық қоғамдық денсаулық сақтау басқармасының мәліметіне қарағанда, соңғы алты жылда Алматы онкологиялық орталығында емделген науқастардың саны артып, өсу динамикасы 71,6 %-ды құраған.

Егер 2017 жылы емделген науқастар саны - 11 607 болса, 2022 жылы Орталықта 19 914 онкологиялық науқас емделді.

Жыл сайын ауруханада жасалатын ота саны орта есеппен 2500-ге жетеді.

«Операциялар операцияға дейінгі және операциядан кейінгі химиотерапияны, инклюзивті көрсеткіштер бойынша сәулелік терапияны қолдану арқылы жүргізіледі. Ең күрделі және жаңашыл хирургиялық араласулардың көпшілігі бөлім меңгерушісі Нұрлан Анарқұлұлы Балтаевтың жетекшілігімен 55 төсек-орынға есептелген онкохирургия бөлімшесінде жасалады. Онкохирургия бөлімшесінде жыл сайын орта есеппен 1400 операция жасалады, оның ішінде аз инвазивті операциялар операциялардың жалпы көлемінің шамамен 50%-ын құрайды. Орта есеппен алғанда, мұнда күніне 5 ауқымды хирургиялық араласу жасалады. Онкогинекология бөлімінде хирургиялық араласулардың саны 400-ге дейін жетеді, оның 60%-на жуығы аз инвазивті, маммология бөлімінде 500-ден астам операция жасалады», - деп хабарлады ведомстводан.

Өткен жылы Орталықта сондай-ақ 1084 онкологиялық науқасқа 18 890 сәулелік терапия сеансы жасалды. Пациенттерге КТ және МРТ, эндоскопиялық зерттеулер, ИГХ және цитологиялық зерттеулер сияқты 73 525 диагностикалық зерттеу жүргізілді.

2022 жылы АОО онкологтары 148 730 консультациялық қызмет көрсетті, бұл 2021 жылмен салыстырғанда 7,9%-ға көп (137 798 қызмет).