Алматыда «Қасым хан» фильмінің кастингі қалай жүріп жатыр
Тарихи туындының бірінші кезеңі 25 сериядан тұрады. Бүгін Қазақфильм алаңында алғашқы кастингке фототүсірілім өтті.
«Түсірілім жұмыстары жазда шілде айында басталады. 25 қаңтардан бастап кастинг жарияладық. Осы уақытқа дейін 5 000 адам келді. Пошта арқылы 9000 адамның мәліметін алдық. 12 наурызда Қазақстанның барлық өңірлерінде кастинг басталады», - деді кастинг-продюсер Алма Баймұратова.
Тарихи туындыға сценарийді бірнеше адам жазып жатыр. Топ жетекшісі - драматург, «Қазақфильм» АҚ сарапшылар кеңесінің төрағасы Бекболат Шекеров.
«Қатысқысы келетіндер өте көп. Бірақ бізге табиғи сұлулық керек. Алматыда 3-80 жас аралығындағы адамдарды іздеп жатырмыз. Ал өңірлерде 15-45 жас аралығында іздейміз. Сонымен қатар, ер адамдардың бойы 180 сантиметрден төмен болмауы тиіс. Және екі иығы кең, жауырыны қақпақтай, даусы жуан болғаны абзал. Келген балалардың да ең алдымен бет-жүзіне назар аударамыз. Балада жасандылық болмайды. Бірінші тур - фототүсірілім. Бұл турда біз қатысушылардың эмоциясын бақылаймыз. Одан өткен адамдарды екінші турға - видеотүсірілімге шақырамыз»,- дейді Алма Баймұратова.
Жобаға көркемдік жетекшілік етуге «Эртургул» киносының режиссері Метин Гюнай шақырылды. Кімнің бас режиссер болатыны әлі белгісіз. Қазір қоюшы-суретшілер костюмдердің эскизін Түркия мамандарымен талқылап жатыр.
«Бүгінгі кастингке отбасымызбен, жолдасым, ұлым, күйеубалам - бәріміз келдік. Кастинг жайлы достарымыздан естідік. Бәріміз драма театры және кино актеріміз. Мен Ресейде оқыдым. Қазақстанға 2 жыл бұрын келдім. Бірқатар отандық жобаларға қатысып үлгердім. Ж.Елебеков атындағы цирк колледжінде актерлік шеберлік пен сахна тілін оқытамын», - дейді Ярославль қаласы театр институтының түлегі Әсел Гүжманова.
Әсел Гүжманова Ресейде «Ника», «Черная река», «Машина любовь» сериалдарына түскен.
Естеріңізге сала кетсек, қазақтың ұлы хандарының бірі - Қасым ханның өмірі туралы баяндайтын киножобаны ҚР Мәдениет және спорт министрлігі тапсырысы бойынша Ш.Айманов атындағы «Қазақфильм» АҚ түсіреді.
25 қаңтар күні Қазақстанның түкпір-түкпірінде кастинг басталды. Үміткерлерге қойылатын басты талап - қазақ тілін білуі.
