Алматыда қаруын дер кезінде өткізбеген азаматтар қылмыстық жауапкершілікке тартылып жатыр

None
None
АЛМАТЫ. ҚазАқпарат - Алматыда қаруын дер кезінде өткізбеген азаматтар қылмыстық жауапкершілікке тартылып жатыр. Жыл басынан бері заңсыз айналымнан 32 қару тәркіленді.

«Барлық деректер бойынша ҚР ҚК 287-бабының 2-бөліміне сәйкес азаматтар қылмыстық жауапкершілікке тартылды. Сондай-ақ, 22 дерек бойынша іс материалдары өндірісте жатыр. Жыл басынан бері азаматтар 93 қаруды өз еркімен полицияға тапсырды. Мерзімінен кешігіп тапсырғаны үшін аталған азаматтар ҚР ӘқК 486-бабының 1-бөлімімен әкімшілік жауапкершілікке тартылды», - деді қалалық ІІД анықтау басқармасы басшысының орынбасары Олжас Шәріпов.

Оның айтуынша, өткен жылы қаңтарда басталған акция барысында қала тұрғындарынан 17 мың қару тапсырылған.

Полиция өкілі қаруды өз еркімен тапсырған жағдайда тұрғындарға қатысты әкімшілік іс қозғалып 5 АЕК, яғни 10 000 теңге мөлшерінде айыппұл төлейтінін айтты.

Ал қару тәркіленген жағдайда оларға 2 000 АЕК мөлшерінде айыппұл және 1 жылға бас бостандығын шектеу немесе сол мерзімге бас бостандығынан айрылу қаупі төніп тұр.

Соңғы жаңалықтар